Ռուսաստանի փողոցներում թող ման գան հարբած, վայր ընկած, տակներն արած մարդկանց ու կտեսնեն՝ они мычат

Ցավակցում եմ ավտովթարի արդյունքում 18 հոգու հարազատներին: Այն ռուս լրագրողները, ովքեր հայ վարորդի հասցեին թույլ են տվել «Վեստիի» թղթակցուհու «բառաչել» արտահայտությունը, ես իրենց եմ վերադարձնում: Թող գնան և Ռուսաստանի փողոցներում ման գան հարբած, վայր ընկած, տակներն արած մարդկանց ու կտեսնեն՝ они мычат: Այն, ինչ արվել է մեր վարորդի հետ, դա վայել չէ այդ հզոր երկրին»: Այս մասին այսօր լրագրողների հետ հանդիպմանն ասաց «Գլոբալիզացիայի եւ տարածաշրջանային համագործակցության վերլուծական կենտրոնի» նախագահ Ստեփան Գրիգորյանը:

Վերջինիս խոսքով՝ առաջին հերթին Հրաչյային պետք է այցելի Ռուսաստանում Հայաստանի դեսպանը, Հայաստանից էլ ԱԳՆ փոխնախարարի մակարդակով պետք է այցելություն կատարվի:

Այնուհետև՝ մինչև դատը, պետք է բարձրացնենք Հրաչյայի վերադարձի հարցը:

Ինչ վերաբերում է Հրաչյա Հարությունյանի դատավարությանը, քաղաքագետը վստահ է՝ արդար դատավարություն չի լինելու, որովհետև հարցն արդեն քաղաքականացված է, սա ուղղակի հաշվեհարդար է:

«ՌԴ-ն այս հարցն ակնհայտ քաղաքականացնում է։ Ակնկալել, որ արդար դատավարություն կլինի, անհնար է, օբյեկտիվ չի կարող լինել, սա կլինի հաշվեհարդար: Մենք այդ հարցերը հստակ պետք է այսօր դնենք»,- ասաց Ստեփան Գրիգորյանը:

Մամլո ասուլիսին ներկա էր նաև փաստաբանների պալատի անդամ, փաստաբան Ռուբեն Բալոյանը, ով այդ բնագավառի մասնագետ է, նշեց, որ տեսանյութից հասկացվում է, թե մեր հայրենակիցն ինչպես է կտրուկ ձախ շրջադարձ կատարում, և եթե «Կամազ» մակնիշի մեքենան ճակատ առ ճակատ բախվեր ավտոբուսին, զոհերի թիվն ավելի շատ կլիներ:

Ըստ նրա՝ պետք է պատասխանատվության ենթարկել նաև Կամազի շահագործման թույլտվություն տված անձին: Հրաչյա Հարությունյանը հոգեկան ծանր վիճակում է, նա բարոյահոգեբանական աջակցության կարիք ունի, որը չի ստանա ռուս պաշտպաններից: