Հայաստանը պետք է սիրել ոչ թե վերացական, այլ կոնկրետ. ԱԺ փոխնախագահ

ՀՀ ԱԺ փոխնախագահ Էդուարդ Շարմազանովը հուլիսի 18-ին հանդիպեց ՀՀ պետական կառավարման ակադեմիայի, Եվրոպական կրթական տարածաշրջանային ակադեմիայի, Հայ-Ռուսական (Սլավոնական) համալսարանի իրավունքի և քաղաքականության ինստիտուտի ուսանողների հետ։

Մեկ ժամից ավելի տևած զրույցն ընթացավ անմիջական ու անկաշկանդ մթնոլորտում, որի ընթացքում երիտասարդները ԱԺ փոխնախագահին ուղղեցին բազմաթիվ հարցեր, որոնք հիմնականում առնչվում էին տնտեսության զարգացմանը, արտագաղթին, հայ-ռուսական հարաբերություններին, Հայաստան-Եվրամիություն, Հայաստան-Եվրասիական միություն հարաբերություններին և մի շարք այլ խնդիրների։
Անդրադառնալով արտագաղթին, Էդուարդ Շարմազանովը նշեց, որ դրա դեմ պայքարի լավագույն միջոցը տնտեսության զարգացումն ու տնտեսական աճն է, ինչին էլ միտված է հանրապետության կառավարության և իշխանությունների ամենօրյա աշխատանքը։

Ուսանողներից մեկին հետաքրքրում էր ԱԺ փոխնախագահի կարծիքը՝ վերջերս ՌԴ Պոդոլսկ քաղաքում տեղի ունեցած ավտովթարի հետ կապված ՀՀ քաղաքացու նկատմամբ ռուսական որոշ լրատվամիջոցների կողմնակալ լուսաբանման վերաբերյալ։

Էդուարդ Շարմազանովը նախ՝ իր ցավակցությունը հայտնեց ավտովթարի հետևանքով զոհվածների հարազատներին։ «Ոչ մեկն իրավունք չունի անհարգալից վերաբերվել ՀՀ քաղաքացու նկատմամբ,-ասաց ԱԺ փոխնախագահը և հավելեց, որ հայ-ռուսական հարաբերությունները չի կարելի կապել այդ խնդրի հետ։ «ՌԴ-ն մեր դաշնակիցն է և մենք պետք է խորացնենք մեր հարաբերություններն այդ երկրի հետ», - ասաց Էդուարդ Շարմազանովը։

Հայաստան-Եվրամիություն, Հայաստան-Եվրասիական միություն հարաբերությունների առնչությամբ ԱԺ փոխնախագահը նշեց, որ Հայաստանի իշխանությունների վարած արտաքին քաղաքականությունը բխում է մեր երկրի շահերից և այն հիմնված է ոչ թե «կամ-կամ», այլ «և-և» սկզբունքի վրա։ «Պետք է խորացնել մեր հարաբերությունները և Եվրամիության, և ՌԴ-ի, և ԱՄՆ-ի հետ,- նշեց ԱԺ փոխնախագահը։

Էդուարդ Շարմազանովն անդրադարձավ նաև իշխանություն-ընդդիմություն հարաբերություններին։ Երկրի և տնտեսության զարգացման համար կարևորեց առողջ քննդատությունն ու նոր և զարգացման հեռանկարներ պարունակող ծրագրերի առաջադրումը։

Հանդիպման ավարտին ԱԺ փոխնախագահը նշելով, որ երիտասարդությունն է մեր երկրի գրեթե բոլոր բնագավառների շարժիչ ուժը, հորդորեց առավել սիրել մեր երկիրը, քանի որ, ըստ նրա՝ «Հայաստանը սկսում է յուրաքանչյուրիս տնից։ Հայաստանը պետք է սիրել ոչ թե վերացական, այլ կոնկրետ»։