Տրանսպորտը թանկանում է. ինչ է անում ԲՀԿ-ն

Երեկ ՀՀ կապի և տրանսպորտի նախարար Գագիկ Բեգլարյանը լրագրողների հետ ճեպազրույցի ժամանակ հաստատել է, որ Երևանի քաղաքապետարանում արդեն իսկ սահմանվել է ուղեվարձի գինը՝ 150 դրամ:

Նշենք, որ Երևանում միկրոավտոբուսների և ավտոբուսների ուղեվարձի թանկացումը կգործի հուլիսի 20-ից։

Այդ օրվանից Երևանում սպասարկվող միկրոավտոբուսների և ավտոբուսների ուղեվարձը կդառնա 150 դրամ՝ ներկայիս 100 դրամի փոխարեն, իսկ տրոլեյբուսների ուղեվարձը՝ 100 դրամ՝ ներկայիս 50 դրամի փոխարեն:

Լուրեր.com-ը տրանսպորտի թանկացման մասին զրուցեց ԱԺ ԲՀԿ խմբակցության քարտուղար Նաիրա Զոհրաբյանի հետ: Վերջինս նշեց, որ մինչ քաղաքապետարանի որոշում կայացնելը, երեկ առավոտյան ԱԺ ԲՀԿ խորհրդարանական խմբակցությունը համատեղ նիստ է անցկացրել:

«Մեզ դիմել էին ուղևորափոխադրող մի քանի կազմակերպություններ, որոնք կտրականապես դեմ էին ուղևավարձի թանկացմանը: Նրանք շատ լավ հասկանում էին, թե դա ինչ հետևանք կարող է ունենալ երևանցու համար, Հայաստանի քաղաքացու համար:

Մինչ այդ մենք անգամ տեղյակ չէինք, որ վաղը՝ օրվա երկրորդ կեսին, հնարավոր է՝ կայացվի նման որոշում: Ուղևորափոխադրումներ կազմակերպող ընկերությունների հետ քննարկում էինք տարբերակներ, թե ինչ մեխանիզմներ է հնարավոր կիրառել թանկացումները կանխելու համար, իրենք էլ մեխանիզմներ առաջարկեցին: Առաջարկները փոխանցել ենք Երևանի ավագանու մեր խմբակցություն:

Հասկանում եմ, որ որոշումը կայացնելուց հետո, հնարավոր է, տպավորություն լինի, որ ոչինչ փոխել հնարավոր չէ, բայց պետք է անել հնարավոր ամենը: Ուղևորափոխադրող ընկերությունների և մեր մասնագետների առաջարկներով հիմա զբաղվում է ավագանու մեր խմբակցությունը:

Մեկ ժամից տեղի կունենա Երևանի ավագանու նիստը, որի ընթացքում կփորձեն ի մի բերել այդ առաջարկները և տեսնել, թե ինչ կարելի է անել: Ինքս հասկանում եմ, որ որոշումն արդեն կայացված է, բայց ինչ որ հնարավոր է, պիտի փորձենք անել:

Պիտի քաղաքական ուժերով անենք ամեն բան, որ սոցիալական ծանրաբեռնվածությունը թեթևացնենք: Քաղաքացիների սոցիալական վիճակը ծայրահեղ վատ է»,- ասաց Զոհրաբյանը:

Գայանե Համբարձումյան