Ադրբեջանն ու Թուրքիան բազմիցս խախտել են Հաագայի կոնվենցիան

Բոլոր պատերազմների ժամանակ էլ պատմական հուշակոթողներ ավերվել են, և այդ ավերումները շարունակվում են նաև մեր օրերում, ինչը մեծ հետք է թողնում մշակութային ժառանգության պահպանման վրա։ Այս մասին այսօր հրավիրված մամլո ասուլիսում ասաց ԻԿՕՄՕՍ-Հայաստանի նախագահ Գագիկ Գյուրջյանը։

Նրա խոսքով՝ խնդիրը սրվեց երկրորդ համաշխարհային պատերազմի ժամանակ, երբ գերմանացիները մեծաքանակ ավար տեղափոխեցին իրենց երկիր։ Գ․Գյուրջյանը հայտնեց, որ մշակութային ժառանգությունը պահպանելու համար 1954-ին ընդունվեց Հաագայի կոնվենցիան, որին Հայաստանը միացավ 1993-ին, այն ստորագրել է մոտ 126 երկիր։ Կոնվենցիան ունի իր նշանը, որը պատկերում է կապույտ վահան, և ՅՈւՆԵՍԿՕ-ն առաջարկել էր այն տեղադրել բոլոր հուշարձանների վրա։

ԻԿՕՄՕՍ-Հայաստանի նախագահն ասաց, որ Հայաստանը ղարաբաղյան պատերազմի տարիներին պահպանել է կոնվենցիան և որևէ մզկիթ չի ավերել, մինչդեռ Ադրբեջանն ավերել է բազմաթիվ հայկական եկեղեցիներ՝ դրանք վերածելով մզկիթների։ «Նախիջևանի տարածքում այսօր հայկական հուշարձանների որևէ հետք չկա»,- ընդգծեց նա։ Նրա խոսքով՝ հայկական հուշակոթողների նկատմամբ ջարդ իրականացրել և իրականացնում է նաև Թուրքիան, որը նույնպես միացել է Հաագայի կոնվենցիային։ Բայց, ըստ մասնագետի, միջազգային կոնվենցիան ոչ միշտ է աշխատում, ուստի հույսը պետք է դնել նաև դիվանագիտական հարաբերությունների վրա։ Նրա հավաստմամբ՝ Հաագայի կոնվենցիան ենթադրում է, որ Հայաստանը կարող է դատի տալ Թուրքիային և Ադրբեջանին՝ իրենց տարածքներում գտնվող հայկական հուշարձանները ոչնչացնելու համար։

Գ․Գյուրջյանը նշեց, որ Հայաստանում պատմամշակութային ժառանգության պահպանման ոլորտը լուրջ բարեփոխումների կարիք ունի։ Նա ընդգծեց, որ Հայաստանն ունի հուշարձանների պահպանության վերաբերյալ լավ օրենսդրություն, բայց այն կյանքի կոչելու համար, նրա կարծիքով, անհրաժեշտ է ստեղծել ինքնուրույն մարմին՝ համալրված մասնագետներով։

Աղբյուրը՝ mardik.am