Մաշտոց-Ամիրյան հատվածում լարված դրություն է՝ ոստիկաններ, բողոքող ուղևորներ ու վարորդներ

tert.am-ի փոխանցմամբ՝ այս պահին Երևանի Մաշտոցի պողոտայի՝ Ամիրյան փողոցին հարակից հատվածում լարված իրավիճակ է: Վաղ առավոտից հասարակական տրանսպորտի թանկացման դեմ բողոքող ակտիվիստները շարունակում են իրենց բողոքի ակցիան՝ այս անգամ նստելով ուղղակի մայթի ասֆալտին և կից կանգառում կայանող երթուղայինների ուղևորներին կոչ անելով՝ չվճարել 150 դրամ կազմող թանկացած ուղեվարձը:

Երիտասարդ ակտիվիստները փորձում են նաև թռուցիկներ փակցնել՝ 150 դրամանոց ուղեվարձը բոյկոտելու կոչերով, սակայն նրանց շուրջը հավաքված ոստիկանության հատուկ ջոկատայինները՝ այսպես կոչված, «հրեշտակների գունդը» թույլ չեն տալիս: «Հրեշտակ-ոստիկանները» աչալուրջ հսկողության տակ են վերցրել նաև կանգառում կայանող երթուղայինների աշխատանքը. ոստիկանները ուշի-ուշով հետևում են, որպեսզի հասարակական տրանսպորտից իջնող ուղևորներն անպայմանորեն վճարեն հենց 150 դրամ, և որևէ մեկը չփորձի իրենց ներկայությամբ բոյկոտի որևէ նշան հանդես բերել և խուսափել վճարելումից:

Ոստիկանների գործողություններին զուգահեռ իրենց գործունեությունն են ծավալում նաև ակտիվիստները, որոնց կոչերին ավելի ու ավելի մեծ թվով մարդիկ են միանում: Հարակից շենքերի բնակիչները, սրճարանների, պիցերիաների այցելուները՝ բոլորը դուրս են եկել փողոց և հետևում են ոստիկաններ-ակտիվիստներ թեժ «պայքարին»: Տեղ-տեղ լսվում են կանանց բորբոքված ձայներ. «Հերի՛ք եղավ, բո՛լ եղավ, մենք էլ չենք տալու, ինչքա՞ն կարելի է...»:

Շարունակությունն՝ այստեղ։