ԱՌՆ ոլորտում ՄԱԶԾ օգնությունն անգնահատելի է

Այսօր ՀՀ ԱԻ նախարարությունում տեղի է ունեցել ամենշաբաթյա խորհրդակցություն, որը վարում էր նախարար Արմեն Երիցյանը։

Խորհրդակցության ընթացքում ՓԾ տնօրեն, գեներալ-մայոր Ս. Ազարյանը զեկուցեց շաբաթվա ընթացքում գրանցված արտակարգ դեպքերի ու ձեռնարկված միջոցառումների մասին։ Երևանի մետրոպոլիտենի հետ աշխատանքներ են տարվում կայաններում տեղադրված տեղադրված տեսախցիկների ու բարձրախոսների միջոցով արտակարգ իրավիճակների դեպքում ազդարարում իրականացնելու համար։ ՓԾ տնօրենը նաև հայտնեց, որ Լեհաստանի հետ նախնական պայմանավորվածություն է ձեռք բերվել ԻՆՍԱՐԱԳ-ի չափանիշներին համապատասխան որոնողափրկարարական թիմ պատրաստելու համար փորձագետ տրամադրելու ուղղությամբ։ Օգոստոսին լեհ մասնագետները կժամանեն Երևան և առկա իրավիճակը գնահատելուց հետո կսկսեն թիմի նախապատրաստումը ՄԱԿ-ի թեստավորմանը։

Ընթացքի մեջ են ՌԴ ԱԻ նախարարության հետ տարվող աշխատանքները' հայ-ռուսական համատեղ մարդասիրական կենտրոն հիմնելու ուղղությամբ։

Ճգնաժամային կառավարման պետական ակադեմիան շարունակում է ընդունելությունը և Լուսակերտի ուսումնական կենտրոնի կառուցապատման աշխատանքները։

Ընթացքի մեջ է հայ-շվեյցարական «Արձագանք. բուժմիավորումներ» ծրագիրը, որի շրջանակներում առաջիկայում Լոռու մարզում կանցկացվի 4 ուսումնավարժություն՝ աղետների բժշկության գծով վերապատրաստված բժշկական անձնակազմի համար։

ԱԻ նախարարին զեկուցեցին նաև, որ Բելառուսում ընթացող պատանի հրշեջ-փրկարարների 11-հավաքին ՀՀ ԱԻՆ պատանեկան թիմը հաջող հադես է եկել՝ սպորտլանդիայում գրավելով մրցանակային 2-րդ, իսկ գեղարվեստական մրցույթում' 3-րդ տեղը։

Խորհրդակցությանը ներկա էր նաև ՄԱԶԾ աղետների ռիսկի նվազեցման և կանխարգելման ծրագրի համակարգող Արմեն Չիլինգարյանը։ ԱԻ նախարարի հրամանով վերջինս պարգևատրվեց ԱԻՆ «Համագործակցություն հանուն փրկության» մեդալով՝ նախարարության հետ սերտ ու արդյունավետ փոխգործակցության, ինչպես նաև 1-ին օգնության եվրոպական մրցումներում հայկական թիմի հաջող ելույթի համար։

Խոսելով ՄԱԿ-ի զարգացման ծրագրով համագործակցության և Ա. Չիլինգարյանի հետ աշխատանքի մասին՝ Ա. Երիցյանը մասնավորապես ասաց.
- Սա մի մարդ է, որն իսկապես սիրում է իր հայրենիքը և մտածում, թե ինչով կարող է օգտակար լինել։ Շնորհակալություն եմ հայտնում, որ միշտ մեր կողքին եք եղել։

Հավելենք, որ Կարմիր խաչի և կարմիր մահիկի միջազգային ֆեդերացիայի 1-ին օգնության եվրոպական մրցումներում 2003 թ. ի վեր հայկական թիմը միշտ ընդգրկվել է լավագույն տասնյակում, իսկ 2004 թվականին՝ գրավել 1-ին տեղը։

ՄԱԶԾ օգնությունն անգնահատելի է ԱԻՆ ճգնաժամային կառավարման կենտրոնի տեխնիկական զինվածության, ԱՌՆ ազգային դիտացանցի ստեղծման, սեյսմիկ կայանների արդիականացման և շատ այլ ոլորտներում առաջընթաց ապահովելու գործում։