ՀՅԴ-ն միացավ բողոքի ակցիաներին. բողոքի ցույց՝ Քաղաքապետարանի դիմաց (տեսանյութ)

Այսօր Երևանի քաղաքապետարանի դիմաց ՀՅԴ «Նիկոլ Աղբալյան» ուսանողական և ՀՅԴ Հայաստանի Երիտասարդական միությունները կազմակերպել էին ակցիա` ընդդեմ տրանսպորտի գնի բարձրացման:

Վերջիններս նշեցին, որ ՀՀ իշխանությունների վարած անհեռանկար քաղաքականության հետևանքով երկրում ստեղծվել են սոցիալ-տնտեսական ծանր պայմաններ, որը հասարակության զգալի հատվածի, հատկապես` երիտասարդության արտագաղթի պատճառ է դառնում: Վերոնշյալ քաղաքականությանն ավելացավ իշխանությունների նոր որոշումը՝ կապված ուսման վարձավճարների և տրանսպորտի թանկացման հետ, որով էլ ավելի բարդացավ հանրության խոցելի հատվածներից մեկի՝ ուսանողության` առանց այն էլ ոչ բարենպաստ կարգավիճակը:

ՀՅԴ «Նիկոլ Աղբալյան» ուսանողական և ՀՅԴ Հայաստանի Երիտասարդական միությունները, ելնելով երկրում տիրող անարդարությունից, ուսանողների իրավունքների անտեսման մտահոգությունից, տրանսպորտի թանկացման պատճառով հանրության լայն զանգվածների դժգոհություններից, ինչպես նաև` այն սոցիալ-տնտեսական քաղաքականությունից, որը վարում են ՀՀ իշխանությունները, կոչ են անում Հայաստանի ողջ ուսանողությանն ու երիտասարդությանը՝ միահամուռ և համախմբված կերպով պայքարել իրենց ոտնահարված իրավունքների համար:

Նշենք, որ ակցիային ներկա էին ԱԺ ՀՅԴ պատգամավոր Արմեն Ռուստամյանը, ում միացավ Երևանի ավագանու «Բարև Երևան» խմբակցության անդամ Դավիթ Սանասարյանը:

Մանրամասները՝ տեսանյութում.