«Բանակումի» Սևոյի հարսանիքն ու 5-օրյա հանգիստը (ֆոտո)

Հարսանքաշատ այս ամռանը՝ հուլիսի 7-ին, ամուսնացավ նաև դերասան Գուրգեն Մելքումյանը, ով նկարահանվել է «Բանակում» սերիալում և մարմնավորել Սևոյի դերակատարին: Գուրգենն ու իր ընտրյալը հարսանեկան ճամփորդությունից վերադարձել են ու պատմել հարսանիքի ու հանգստի մանրամասները:

Գուրգենի ընտրյալն իր հասակակից՝ 26-ամյա Արփինե Գրիգորյանն է, ով անգլերենի և իտալերենի մասնագետ է: Նրանք հանդիպել են մի գրասենյակում, որտեղ աշխատել է Արփինեն, որից հետո Գուրգենը որոշել է զբոսանքի հրավիրել իր սիրտը գրաված աղջկան, ինչից էլ սկսվել է նրանց սիրո պատմությունը: Գուրգենի խոսքերով` հատուկ սիրո խոստովանություն չի արել Արփինեին, պարզապես երկուսուկես ժամ միմյանց ամուր գրկած կանգնել են ուռենու տակ ու ոչինչ չեն խոսել: Երկու տարի առաջ՝ հուլիսի 7-ին տեղի ունեցած հանդիպումից հետո էլ զույգը որոշել է ամուսնանալ, իսկ հարսանիքից մեկ շաբաթ առաջ տեղի է ունեցել նրանց խոսքկապի արարողությունը: Ըստ զույգի` մինչև ամուսնանալը բուռն սիրավեպ են ունեցել, որի ընթացքում Գուրգենը մի շարք անակնկալներ է մատուցել Արփինեին:

Գուրգենն ու Արփինեն հայկական ավանդական հարսանիք են ունեցել` պսակադրվելով Սուրբ Սարգիս եկեղեցում, որից հետո լուսանկարվել են այգում և քեֆ-ուրախությունը շարունակել ռեստորանային համալիրում:

Նրանց խոսքերով` շատ լավ և ուրախ հարսանյաց հանդես են ունեցել, որին հրավիրված են եղել միայն ամենամոտ մարդիկ ու ընկերները: Հարսանիքին հյուր է եղել նաև երգիչ Գևորգ Բարսամյանը, ով որոշ երգեր է նվիրել նորապսակներին: Հարսանյաց հանդեսի ընթացքում զույգը նաև անակնկալներ է մատուցել հյուրերին` նրանցից ոմանց շնորհելով «Լավագույն պարող», «Լավագույն քույրիկ» և «Լավագույն խմող» անվանակարգերով պատվոգրերը:

Նորապսակների հարսանյաց հանդիսավարը Գուրգենի խաղընկեր՝ նույն հեռուստանովելում Հրաչին մարմնավործ Հայկ Պետրոսյանն էր, ում հարսանիքի մանրամասները esyes.am-ն արդեն պատմել է:

Զույգը հարսանիքից հետո 5-օրյա ճամփորդության է մեկնել Ուռեկի, որտեղից նորապսակները վերադարձել են արևահարված ու հանգիստը վայելած: