Ո՞ւմ գրպանն են լցվում ապահովագրության համար նախատեսված գումարները

ՀՀ կառավարության 2011 թվականի դեկտեմբերի 29-ին ընդունած որոշմամբ՝ սահմանվեց պետական աշխատողների ապահովագրության կարգը:

Նախորդ տարվա հունվար-հունիս ամիսների տվյալների համաձայն՝ պետական աշխատողների ապահովագրության համար պետական բյուջեից հատկացվել է 3,6 մլրդ դրամ, որից 3,1 մլրդ դրամն օգտագործվել է բժշկական ապահովագրության նպատակով:

Օրեր առաջ Lurer.com-ին հայտնի դարձավ, որ Արդարադատության, Պաշտպանության նախարարության և Ոստիկանության աշխատակիցներն այլևս չեն ապահովագրվում: Թե ում գրպանն է լցվում ապահովագրության համար պետական բյուջեից հատկացված գումարները, տեղյակ չեն, բայց դժվար չէ ենթադրելը:

Նշենք, որ ապահովագրություն չունեցողներն էլ նշված նախարարություններում բարձր պաշտոն ունեցող աշխատակիցներ են։

Հարցի խորությունը հասկանալով` Lurer.com-ի թղթակիցը զրուցեց այդ գերատեսչությունների մամլո խոսնակների հետ։ Արդարադատության նախարարի մամլո խոսնակ Կարինե Քալանթարյանը հերքեց տեղեկությունը. «Չի համապատասխանում իրականությանը։ 2013 թվականի համար աշխատակիցներն ապահովագրվել են», -ասաց նախարարի խոսնակը։

Նույն պատասխանն ուներ նաև Ոստիկանության Հասարակայնության հետ կապի և լրատվության վարչության աշխատակից Արմեն Մալխասյանը. «Մենք բոլորս ունենք այդ սոցփաթեթը։ 2013 թվականին ևս ապահովագրել ենք, և բոլոր աշխատակիցներն էլ ապահովագրվել են»։

ՊՆ մամլո խոսնակ Արծրուն Հովհաննիսյանը մեզ հետ զրույցում ասաց, որ ավանդական ապահովագրության համակարգը իրենց համար չի կիրառվում. «Մեզ համար հատուկ օրենք կա. սովարական Ձեր պատկերացրած ապահովագրությունը, որ քաղաքացիական անձանց կամ պետական այլ ծառայողներին անում են, մեր նկատմամբ չի կիրառվում։ Օրենքին համապատասխան՝ ուրիշ ձև է։ Մեզ համար պետությունը երաշխավորում է մեր բժշական ծառայությունները՝ մեր Զինվորական հոսպիտալների միջոցով», - ասաց Արծրուն Հովհաննիսյանը։

Չնայած մամլո պատասխանատուների հերքումներին, որոնք անակնկալի չբերեցին մեզ, մեր աղբյուրները շարունակում են պնդել՝ խնդիրն իսկապես առկա է, և իրենք չունեն ապահովագրություն։ Միգուցե այդ կերպ ցանկանում են նոր սկանդալները կանխել, քանի որ խոսքը մեծ գումարների մասին է, և այդքան խնամքով թաքցված տեղեկատվության արտահոսքը կանխել: