Գործընկերները կիսվում են իրենց փորձով

ՀՀ ԱԻՆ աշխատակազմի Սեյսմիկ պաշտպանության ծառայության համակարգի մասնագետներն արտերկրի լավագույն սեյսմոլոգիական ծառայություններ կատարած գործուղումներից հետո ոչ միայն ղեկավարներին են հաշվետվություն ներկայացնում, այլև` շնորհանդեսի ձևով իրենց գործընկերներին պատմում այլ երկրների փորձի մասին, ինչն արդեն ավանդույթ է դարձել:

Օրերս տեղի ունեցավ երկու նմանատիպ շնորհանդես: Ներկայացվեց հունիսին Վիեննայում կայացած «Գիտություն և տեխնոլոգիա 2013» խորագրով գիտաժողովը, որին մասնակցում էր ավելի քան 750 ներկայացուցիչ' աշխարհի տարբեր երկրներից: Գիտաժողովը կազմակերպել էր «Միջուկային փորձարկումների համապարփակ արգելում» (CTBT) կազմակերպությունը: Ներկայացվել էր շուրջ 450 զեկույց: Գիտաժողովն ընդգրկում էր երեք հիմնական թեմա՝

- երկրագունդն ինչպես համալիր համակարգ.
- իրադարձությունները և դրանց բնութագրիչները:
- սենսորներ, ցանցեր և տվյալների մշակում:

Այս գիտաժողովին Հայաստանը ներկայացրել էր ՍՊԾ համակարգի մասնագետների ուսումնասիրած խիստ արդիական թեմայով՝ «Ակտիվ խզվածքները և սեյսմիկության ու խզվածքների վարքագծի առանձնահատկությունները ՀՀ տարածքում» զեկույցով։ Այն մեծ հետաքրքրություն էր առաջացրել գիտաժողովի մասնակիցների շրջանում: Դրա ամենավառ ապացույցն առաջարկություն էր աշխատանքը տպագրել հեղինակավոր ISSN ամսագրում:

Մյուս զեկույցը վերաբերում էր վերջերս Մակեդոնիայի Սկոպյե քաղաք գործուղմանը: «Երկրաշարժերի կանխատեսման հնարավորության, սեյսմիկության և կլիմայի փոփոխության կորելյացիայի համալիր հետազոտում» համաեվրոպական նախագծի շրջանակներում փորձի փոխանակման նպատակով հրավեր էր ստացվել մեկ ամսով համատեղ աշխատանքներ իրականացնել Սկոպյեի Սեյսմոլոգիական դիտարանում: Նախագիծը ֆինանսավորվում է Յոթերորդ շրջանակային ծրագրով' Մարիա Կյուրի հիմնադրամի կողմից:

Փորձի փոխանակման նպատակով այցելության ընթացքում ՍՊԾ-ի մասնագետները հաստատեցին նոր գործնական կապեր, ծանոթացան դիտարկման համակարգերին, սեյսմիկ իրադարձությունների և դրանց երկրաֆիզիկական նախանշանների վերլուծության ընթացքին, մասնակցեցին սեյսմիկ գրանցումների մշակման աշխատանքներին, ինչպես նաև ծանոթացան տվյալների հավաքման և մշակման համար կիրառվող ծրագրերին: