Հունաստանի հյուպատոսը ենթարկվում է ՀՀ ԱԳ նախարարի՞ն

Այս օրերին, երբ հայ հասարակությունն իր արդարացի բողոքն է բարձրացրել տրանսպորտի թանկացումների դեմ, իշխանավորներն էլ գտել են «թռչելու» ամենահարմար տարբերակը՝ արձակուրդում են, Հրայր Թովմասյանի նման ապաշնորհ նախարարներն ու ՀՀԿ-ական ծերակույտի ներկայացուցիչներն էլ ի ցույց են դնում իրենց «մառազմատիկ» մտքի գոհարները՝ էլ ավելի իջեցնելով իրենց 0-ական վարկանիշը, զուգահեռաբար տեղի են ունենում նորանոր բացահայտումներ ՀՀԿ-ական նախարարների «ատկատանպաստ» գործունեությունից: Օրինակ, էկզոտիկայի և աֆրիկյան պետությունների մեծ երկրպագու Էդվարդ Նալբանդյանը թեև գծատեր չէ, սակայն, պարզվում է՝ բացի Սվազիլենդի և Ուգանդայի հետ դիվանագիտական հարաբերություններ հաստատելուց և իր բուն պարտակությունները կատարելուց (որոնք իրականում չի կատարում)՝ ավելի հետաքրքիր ֆունկցիա էլ ունի, որը գծատիրոջ գործից ոչ պակաս եկամտաբեր կարող է լինել:

Օրերս Lurer.com-ի խմբագրություն էր զանգահարել մի քաղաքացի, ում անունը իր խնդրանքով չեմ հրապարակում, և հայտնել, որ վերջերս պատրաստվում էր Վրաստանից Հունաստան մեկնել, քանի որ Վրաստանից դա անհամեմատ ավելի էժան է նստում: Տուրիստական ընկերությունում, որտեղից քաղաքացին վերցրել է ուղեգիրը, նրան զգուշացրել են, որ եթե իր մեկնումը ցանկանում է իրականացնել Վրաստանից, ապա Հայաստանում Հունաստանի հյուպատոսարանը միանշանակ վիզա չի տրամադրի, քանի որ, ինչպես նշել է ընկերության աշխատակիցը, Հայաստանում Հունաստանի հյուպատոսն այդ մասին համապատասխան հրահանգ ունի ստացած արտգործնախարար Էդվարդ Նալբանդյանից:

Ստացվում է, որ ՀՀ իշխանություններին ձեռնտու է, որ Հայաստանում ավիատոմսերի գները բարձր լինեն և ոչ մի կերպ չիջնեն, որ ՀՀ քաղաքացին չկարողանա Հայաստանից դուրս գալ էժան տարբերակով, այլ միայն` մեծ գումար ծախսելու միջոցով: Այն աստիճան է ձեռնտու, որ նույնիսկ միջազգային կառույցների ներկայացուցիչներին են կարողացել ամբողջությամբ ենթարկել իրենց: Նման շահագրգռվածություն կարող է լինել այն դեպքում, երբ այդտեղից խոշոր եկամուտներ են լինում՝ «ատկատների» տեսքով:

Ի դեպ, Էդվարդ Նալբանդյանի պարագայում սա առաջին դեպքը չէ. նախարարը միշտ էլ աչքի է ընկել «Ճ» դասի պետությունների հանդեպ իր կրքոտ սիրով և այդ սիրո վրա բյուջետային միջոցների անիմաստ վատնումով: Ինչպես ցանկացած հայաստանյան միջին վիճակագրական պաշտոնյա, այն էլ՝ ՀՀԿ-ական, Նալբանդյանը նույնպես չի կարող զերծ մնալ պետբյուջեից քերելու կամ Շարմազանովի ասած՝ բյուջեն լափելու հակումներից: Պարզապես երբեմն պետական պաշտոնյաները, նախարարներն այնքան են տարվում քերելու ու լափելու գործընթացով, որ մոռանում են իրենց բուն պարտականությունների՝ Նալբանդյանի դեպքում՝ արտաքին քաղաքականություն իրականացնելու մասին: Դրանով էլ կարելի է բացատրել Հայաստանի դիվանագիտական խայտառակ պարտությունները, Ռամիլ Սաֆարովի արտահանձնումը, Հրաչյա Հարությունյանի ստորացումը և ՀՀ ապաշնորհ իշխանությունների վախկոտ լռությունն այդ առիթով:

Այստեղ առավել ուշագրավ է այն հանգամանքը, որ Հունաստանի հյուպատոսը իր երկրի իշխանություններին ենթարկվելու փոխարեն ենթարկվում է Էդվարդ Նալբանդյանին: Չնայած եթե հաշվի առնենք, որ սա Հայաստանն է և վերջ, ապա ամեն ինչ ընկնում է իր տեղը, ամեն ինչ համընկնում է, քանի որ սա մի պետություն է, որտեղ նույնիսկ ֆիզիկայի օրենքները կարող են չգործել, պետություն, որը առայժմ ղեկավարում են քրեաօլիգարխները, հանցագործները, գծատերերն ու հաստավիզները, և կշարունակեն ղեկավարել, եթե շարունակենք թույլ տալ: Իսկ ինչ վերաբերում է թույլ տալ կամ չտալուն, ապա տրանսպորտի թանկացումների դեմ տարած երեկվա հաղթանակն, ի դեպ, ապացույցն էր այն բանի, որ մենք կարող ենք թույլ չտալ:

Կարեն Վարդանյան