Ախալքալաքի հայերը անհանգստացած են երկքաղաքացի անձանց Վրաստանի քաղաքացիությունից զրկելու հանգամանքից

Վրաստանում Ախալքալաքը ներկայացնող մեծամասնական թեկնածու Սամվել Պետրոսյանը պահանջում է դադարեցնել երկքաղաքացիություն ունեցող անձանց Վրաստանի քաղաքացիությունից զրկելու գործընթացը: Այս մասին նա հայտարարել է այսօր խորհրդարանի արտահերթ նիստի ժամանակ: 

«Վերջին 2 ամիսների ընթացքում Վրաստանի հազարավոր քաղաքացիներ զրկվել են երկքաղաքացիությունից: Նրանց թվում Վրաստանի քաղաքացիությունը կորցրել են նաև Ախալքալաքի շրջանի բնակիչները, ովքեր ունեցել են երկքաղաքացիություն: Մեր երկրում դա արգելված է: Կարծում եմ, որ օրենքը պիտի աշխատի մարդկանց համար, ոչ թե մարդիկ՝ օրենքի: Քաղաքացիության զրկումով մենք բարոյական, նյութական և իրավական վնաս ենք հասցնում մեր երկրին: Կարծում եմ, որ այս օրենքը  պետք է փոփոխության ենթարկվի  կամ էլ համապատասխան համաներում անցկացվի, սակայն ամեն դեպքում, գործընթացը պետք  է կասեցվի: Ախալքալաքում սա գնահատում են իբրև ազգային փոքրամասնության իրավունքների ոտնահարում, իսկ դա վնաս է հասցնում Վրաստանի հեղինակությանը»,-նշել է Պետրոսյանը: