Հայկ Մարության. «Չեմ ուզում մտնել քաղաքականություն»

Ուղեվարձի թանկացման դեմ քաղաքացիական հասարակության հաղթանակից հետո երիտասարդներն ու հանրահայտ դեմքերն ամբողջովին ազարտի մեջ են ընկել, նրանք չեն պատրաստվում գնալ տուն, երեկ նրանց մի մասը քաղաքապետարանի առջեւ նստացույց էր սկսել եւ նոր պահանջներով էր հանդես գալիս: Արդյոք քաղաքացիական հասարակության զարթոնքը չի՞ խամրի հետագայում, եւ արդյո՞ք հասարակության այս ակտիվ շերտը նույն եռանդով կմասնակցի առաջիկայում երկրում առկա մյուս խնդիրների լուծմանը: «Հրապարակ»-ը զրուցեց ուղեվարձի թանկացման դեմ ակցիայի առաջամարտիկ, կազմակերպիչ «Կարգին» Հայկոյի՝ Հայկ Մարությանի հետ:

- Հայկ, ինչպե՞ս ընդունեցիք ուղեվարձի թանկացման որոշման կասեցումը, համարո՞ւմ եք դա քաղաքացիական հասարակության հաղթանակը:

- Իհարկե, ես ուրախ եմ, շատ ուրախ եմ մեր քաղաքացիների համար, որոնք կարողացան պայքարել եւ հասնել հաղթանակի: Այս ընթացքում մի շատ կարեւոր բան բացահայտվեց. մենք տեսանք, թե ինչ հրաշալի, պայքարող երիտասարդություն ունենք: Երիտասարդություն, որը ցնցեց ամբողջ հայ ազգը եւ ցույց տվեց, որ մենք ապագա ունենք: Ես ուղղակի հիանում եմ իրենցով:

- Ձեր պայքարը երկրում առկա ցավոտ հարցերի լուծման ուղղությամբ այսքանով սահմանափակվելո՞ւ է, թե՞ շարունակելու եք քաղաքացիական ակտիվ կեցվածք դրսեւորել այլ կնճռոտ հարցերի նկատմամբ:

- Ճիշտն ասած, ես ընդհանրապես բոլոր հարցերում ակտիվ կեցվածք եմ ընդունել, ուղղակի այս հարցում ես ֆիզիկապես եմ կոնկրետ գործողություններ արել: Մնացած հարցերում, ցավոք սրտի, ֆիզիկապես ոչ մի օգնություն չեմ կարողացել ցուցաբերել մեր ժողովրդին, ենթադրենք գազի եւ այլ ապրանքների թանկացման հարցում…

- Ի դեպ, ինչո՞ւ ակտիվ չէիք նախկինում, ինչո՞ւ չեք կարողացել այդ հարցերում էլ մասնակից դառնալ, օրինակ, բնապահպանական եւ այլ խնդիրների լուծմանը:
- Ես կարող եմ ասել, որ ամեն մեկն իր չափով պետք է գործ անի, թող ամեն մեկն անի այն, ինչ կարողանում է: Առհասարակ, մի մարդը չի կարող ամեն ինչ անել, եթե այդպես լիներ, Հայաստանում կլիներ ընդամենը մեկ նախարարություն եւ մեկ նախարար, եւ ինքը կզբաղվեր ամեն ինչով:

- Այնուամենայնիվ, Դուք շարունակելո՞ւ եք պայքարել այլ հարցերում, այսինքն, Ձեր ասած՝ ֆիզիկական ակտիվ մասնակցություն ցուցաբերել:

- Յուրաքանչյուր հարց, որ մտահոգում է ժողովրդին, մտահոգում է նաեւ ինձ: Յուրաքանչյուր հարցում ինչքանով որ կարողանամ, կպայքարեմ եւ կօգնեմ ժողովրդին, քանի որ ժողովրդի մի մասնիկն եմ ես:

- Հայկ, ի վերջո, ինչո՞ւ հենց հիմա ծայր առան բողոքի ակցիաները, Դո՞ւք էլ հասկացաք, որ քաղաքական կուսակցություններն իրենց սպառել են, եւ մեզնից յուրաքանչյուրն իր վրա պետք է հույսը դնի: Ի դեպ, հնարավո՞ր է, որ հանրահայտ դեմքերով քաղաքացիական շարժումը վերածեք քաղաքական կառույցի, կուսակցության՝ օրինակ:

- Ես, ճիշտն ասած, քաղաքականությամբ չեմ զբաղվում եւ չեմ էլ ուզում զբաղվել… Պատճառ չեմ կարող ասել, բայց կարող եմ ասել՝ իսկապես զարթոնք է տեղի ունեցել:

- Ձեր հաղորդումները, սակայն, բավականին քաղաքականացված են:

- Չէի ասի՝ քաղաքականացված, ավելի շատ քաղաքացիականացված են, թեպետ տարբեր մարդիկ տարբեր կերպ կարող են դա ընկալել, ովքեր ցանկանում են՝ այնտեղ քաղաքականություն կտեսնեն, ովքեր ուզում են տեսնել ուրիշ մի բան՝ կտեսնեն այդ բանը: Իհարկե, որպես քաղաքացի, հետեւում եմ պրոցեսներին, բայց չեմ զբաղվում եւ չեմ ուզում մտնել քաղաքականություն ՝ դրանից բխող հետեւանքներով:

Առավել մանրամասն՝ «Հրապարակ»-ի այսօրվա համարում