Հայ բռնցքամարտիկները՝ միջազգային մրցաշարի մրցանակակիրներ

Սանկտ Պետերբուրգի միջազգային մրցաշարից հայրենիք վերադարձավ Հայաստանի բռնցքամարտի հավաքականը:

Գլխավոր մարզիչ, վաստակավոր մարզիչ Կարեն Աղամալյանն ասաց, որ կիսաեզրափակիչ մտած 3 տղաներից միայն Երևանի ՕՀ պետական քոլեջի սան Նարեկ Աբգարյանին (52 կգ) հաջողվեց մտնել վճռական՝ վերջին փուլ: Այստեղ նրա մրցակիցն էր աշխարհի երիտասարդների փոխչեմպիոն Մուրադջան Ահմադալիևը (Ուզբեկստան): Նարեկը, կարելի է ասել, չպարտվեց, բայց՝ նաև չհաղթեց: Ի վերջո, մտորումներից հետո մրցավարները նախապատվությունը տվեցին Ահմադալիևին:

Երրորդ մրցանակակիր դարձան վանաձորցի Արարատ Մխիթարյանը (56 կգ) և էջմիածինցի Արա Պուլուզյանը (64 կգ): Ռինգ ելած մեր մյուս երեք տղաները նախնական փուլերում ձախողվեցին և անմասն մնացին խաղարկված պարգևներից:

Ս. Պետերբուրգի՝ «Մարզպետի գավաթ» անունը կրող խոշոր մրցաշարը ներկայացուցչական էր և 22 թիմերում քիչ չէին հեղինակությունները: Մասնակիցների և մարզիչների համար նաև ընտրական բնույթ էր կրում ստուգատեսը, քանզի աչքի ընկածներով պետք է համալրվեն հավաքականները, որոնք կմասնակցեն հոկտեմբերի 11–27–ը Ալմաթիում անցկացվելիք աշխարհի առաջնությանը:

Հայաստանի ազգային հավաքականը սեպտեմբերի 8–ից ուսումնամարզական հավաք կսկսի Ծաղկաձորում: Հնարավոր է մեր տղաներին միանան Ռուսաստանի, Լիտվայի, Թուրքմենիայի և Գերմանիայի բռնցքամարտիկները:

Դեռևս չի ճշգրտվել մեր թիմի կազմը: Ունենք 8–10 հավասարազոր հնարավորություններով մարզիկներ: Հույս ունենք, որ Ուկրաինայում բնակվող, գերծանրքաշային Արմեն Սիմոնյանին բռնցքամարտի միջազգային ֆեդերացիան կթույլատրի հանդես գալ մեր թիմի կազմում: Այս մասին այնտեղ ուղարկված մեր նամակի պատասխանին ենք սպասում:

Բարձր պատրաստականությամբ մարզիկներ չունենք 69, 81 և 91 կգ քաշային կարգերում: Ուստի մեր կամքին հակառակ հավաքականը աշխարհի առաջնություն կուղեկցենք թերի կազմով: