Ազատամարտիկներն անտեսված են. Գյումրիում նստացույցը շարունակվում է (լուսանկարներ)

Արդեն հինգ օր է, ինչ Գյումրիի Թատերական հրապարակում ազատամարտիկները նստացույց են անում: Նստացույցի պահանջն է՝ բարելավել ազատամարտիկների սոցիալական վիճակը, զինվորական թոշակները, 50 տոկոս զեղչ ունենալ կոմունալ վարձերի վրա:

Լուրեր.com-ը զրուցեց ազատամարտրիկների հետ. վերջիններս նշեցին, որ իրենք ընդամենը 5 օր է, ինչ նստացույց են անում Գյումրիում, բայց միշտ էլ համախոհ են եղել իրենց այն ընկերներին, ովքեր Երևանում նստացույց են արել:

«Հարցը սոցիալական է, մենք քաղաքական ոչ մի պահանջ չունինք: Ազատամարտիկը իրավունք չունի իր երկրի մեջ էս ծայրահեղ վիճակի մեջ ապրելու, իրավունք չունի մինչև հիմա տուն չունենա, ըսենք՝ թոշակները հերիք չընեն, չկրնա նվազագույն բարօրությունը ապահովէ»,- ասաց ազատամարտիկ Մկրտիչ Բաղդասարյանը:

Մեր հարցին, թե այս հինգ օրերի ընթացքում պաշտնոյաները հանդիպել են իրենց, որևէ աջակցություն կամ առաջարկ եղել է, թե` ոչ, Բաղդասարյանն ասաց.

«Գյումրիում ոչ մի հոգի չի մոտեցել: Այ էդիգ է զարմանալի, որ գյումրեցի պաշտոնյաները, օրինակ թե՛ մարզպետարանից, թե՛ քաղաքապետարանից, ոչ ոք չի եկել, մի հատըմ չի հարցրել՝ լավ է էս քաղաքի մեջ, էս տղերքը նստած են, նստացույց կընեն մի հատ, չմոտենա՞նք՝ որպես պաշտոնյա:

Մենք իրանց ազգն ենք, թե՞ մենք այլ ազգ ենք, երկնքից խո չե՞նք իջել: Նույն համաքաղաքացի ենք, նույն Շիրակի դաշտավայրից ենք: Հետաքրքիր չէ՞ քաղաքապետին, մարզպետներին ու մյուս կառույցներին, որ մի հատ մոտենան, մի ինչ-որ հարցով պռոստը մոտենան։ Թե՞ էսիգ նշանակում է, որ իրենք մեզ անտեսում են: Եթե իրենք մեզի են անտեսում, մենք էլ իրանց կանտեսենք:

Էսիգ ընդհանուր պահանջ է, էստեղ մի հոգու հարց չէ բարձրցրած, էստեղ էնպիսի չնչին հարցեր են, որ հենց մեր քաղաքապետը կարա լուծի, մեր մարզպետը կարա լուծի: Հարցեր ունինք, որ իրանք էլ կրնան էդ հարցերին լուծում տան, բայց ինձի հետաքրքիր ա, որ էսի արդեն հինգերորդ օրն է՝ մի հոգին չի մոտենա, իրենց համար էսիգ սովորական երևույթ է»:

Ազատամարտիկները նշեցին նաև, որ նստացույցը դեռ կշարունակեն այնքան ժամանակ, ինչքան ֆիզիկապես կկարողանան, բայց նաև ավելացրին, որ պայքարելու են մինչև վերջ:

Լուրեր.com-ը զրուցեց նաև Գյումրու քաղաքապետ Սամվել Բալասանյանի մամուլի խոսնակ Զոհրաբ Եգանյանի հետ: Վերջինս, անդրադառնալով հարցին, թե ինչպես է քաղաքապետը վերաբերվում այն հանգամանքին, որ արդեն հինգ օր է՝ քաղաքի կենտրոնում ազատամարտիկները նստացույց են անում, ասաց.

«Փառք Աստծո, Գյումրին դարձել է ազատ քաղաք, մարդիկ ազատորեն հայտնում են իրենց բողոքը: Շատ են նման ակցիաները, և դա ինչ-որ տեղ գովելի է, ինչ-որ տեղ էլ՝ հասկանալի, որ խնդիրները շատ են: Պարոն Բալասանյանի աշխատանքային գրաֆիկը շատ խիտ է, այդ պատճառով էլ չի կարողացել այցելել ազատամարտիկներին»:

Վերջինս նշեց նաև, որ Գյումրիում սոցիալական խնդիրները շատ են: Իսկ հարցին, թե քաղաքապետարանը որևէ կերպ կաջակցի՞ ազատամրտիկներին, Եգանյանն ասաց.

«Տոն օրերին մենք ազատամարտիկներին դրամային օգնություն ենք ցուցաբերում: Այսինքն՝ այնքանով, որքանով քաղաքապետարանը կարողանում է, փորձում է օգնել: Սա այնպիսի հարց է, որ քաղաքապետարանի իրավասությունների մեջ չէ, բայց, իհարկե, մենք ցանկանում ենք, որ բոլոր ազատամարտիկները սոցիակալան լավ պայմաններում ապրեն»:

Գայանե Համբարձումյան