«Առավոտ». ԵՄ-ն «երկնագույնների» հոմանիշը չէ

«Առավոտ»-ի այսօրվա խմբագրականում գրված է.

«Եթե Հռոմի պապը միասեռականների մասին ասում է՝ «ո՞վ եմ ես, որ նրանց դատեմ», ապա դա բացարձակապես չի նշանակում, որ կաթոլիկ եկեղեցու առաջնորդը կողմ է կամ խրախուսում է այդ ախտը։ Ոչ մի քրիստոնյա հոգևորական և առհասարակ՝ ոչ մի քրիստոնյա չի կարող դրական վերաբերմունք ունենալ սոդոմական մեղքի նկատմամբ։ Խոսքը բոլորովին այլ քանի մասին է. մենք՝ մահկանացուներս, չենք կարող ինքներս մեզ որևէ մեկի գլխին բարոյական դատավոր կարգել, որովհետև ոչ մեկս կատարելության մարմնավորում չենք։ Իսկ ով այնքան է գոռոզանում, որ իրեն ինչ-որ առումով կատարյալ է համարում, նրա վերջը սովորաբար վատ է լինում։

Պարզ, հասկանալի արժեքներ՝ չեմ կարծում, որ դրանք 100 տոկոսով եվրոպական են կամ նույնիսկ՝ զուտ քրիստոնեական, բայց դրանց, համոզված եմ, պետք է ձգտեն բոլոր ազգերը։ Ունեցիր քո կյանքը, քո համոզմունքները, քո տեսակետները, բայց երբեք դրանք ուրիշների համար էտալոն մի համարիր։ Ի՞նչ վատ բան կա դրանում։ Եվ խոսքն այստեղ ոչ միայն և ոչ այնքան սեռական կյանքի մասին է, որքան այն սկզբունքների, որոնց միջոցով կազմակերպվում են քաղաքական, հասարակական կյանքը, բիզնեսը, մշակույթը։

Եվրամիության հետ Հայաստանի բանակցությունները հաջողությամբ ավարտվել են։ Ես չգիտեմ՝ արդյոք մեր իշխանությունը փաստարկներ կգտնի՞, որոնք կհամոզեն ռուսներին շատ չխանդել և շատ սարսափելի հետևանքներով մեզ չսպառնալ։ Հուսանք, որ այդպիսի փաստարկներ կգտնվեն՝ Ռուսաստանի հետ մենք պարտավոր ենք պահպանել դաշնակցային հարաբերություններ։ Բայց մի բանում վստահ եմ՝ Վիլնյուսում նոյեմբերի 29-ին նախաստորագրվելիք պայմանագիրը ոչ մի կապ չունի միասեռական ամուսնությանները կամ գեյ-շքերթները թույլատրելու հետ։ Այդ հեքիաթները տարածում են Ռուսաստանի ազդեցության գործակալները, իսկ մեր համաքաղաքացիների մի մասը հակված է հավատալ կացնային քարոզչությանը։ Ոչ մի կասկած չունեմ, որ Հայաստանում ԵՐԲԵՔ նման օրենքներ չեն ընդունվի՝ հազվադեպ եմ ապագայի մասին գրում, համոզվածության այս աստիճանով, սակայն սա հենց այդ դեպքն է»:

Ինդիրն, իհարկե, տեղեկատվության պակասն է: Մեր դիվանագետները ստորագրվելիք փաստաթղթերի վերաբերյալ, ինձ թվում է, ավելորդ գաղտնապահություն են ցուցաբերում: Հայաստանցիներից ոչ բոլորը գիտեն, որ մեր երկրի և ԵՄ-ի միջև Ասոցացման պայմանագրի գլխավոր տարրն է «Խորը և համապարփակ ազատ առևտրի գոտու» {Deep and Comprehensive Free Trade Area} հաստատումը և ոչ թե սեռական աննորմալ կողմնորոշումները: Հետևաբար, թե մենք՝ լրատվամիջոցներս, թե պաշտոնյաները, թե քաղաքական գործիչները պետք է ավելի շատ կենտրոնանանք նրա վրա, թե ինչ օգուտներ կամ վնասներ կարող է բերել նման առևտրի գոտին, ոչ թե պոպուլիզմ խաղան «երկնագույների» գույություն չունեցող թեմաների վրա:

Պարզապես լուրջ թեմաների մասին խոսելու համար որոշակի գիտելիքներ են պետք: