«Հրապարակ». Երգելն էլ հո գործ անել չի՞

Ամառային արձակուրդից առաջ ԱԺ վերջին հարցուպատասխանի եկած կառավարության անդամներին «Հրապարակ»-ը հիշեցրեց իրենց նախորդների՝ պաշտպանության եւ ներքին գործերի նախարարներ Վազգեն Սարգսյանի ու Վանո Սիրադեղյանի մի շատ լավ սովորույթի մասին, երբ կարեւոր օրերին միասին երգում էին:

Թերթի թղթակիցը փորձեց ճշտել, թե իրենք հեչ երգո՞ւմ են, ունե՞ն ինքնարտահայտվելու նման մարդկային մշակույթ: Հիշեցնենք, որ Վազգենի ու Վանոյի սիրած երգերից մեկը «Պառավ յարս թանկ է, թանկ» երգն էր:

Արմեն Աշոտյանն իր «հուշերի մշուշում» չէր հիշում, որ Վազգենն ու Վանոն այդ երգը երգել են: «Չէ, չեմ հիշում»: Փոքր էիք՝ ուրեմն, մեծացաք ու անմիջապես նախարար դարձաք' առանց երգելու: «Ինչո՞ւ այդպես. ես էլ երգեր եմ գրում, ի՞նչ տարբերություն, կերգեմ էն ժամանակ, եթե գրածս երգը ոչ մեկին չեմ վստահի»:

Գագիկ Բեգլարյանը «երբեւէ երգո՞ւմ եք» հարցին խորը ափսոսանքով ասաց. «Չէ՜, ես ձայն չունեմ, որ երգեմ»: Գոնե «Պառավ յարս թանկ է, թանկ»-ի համա՞ր էլ չունեք: «Յա՜, պառավ յա՞րը որն է»:

Սոցապնախարար Արտեմ Ասատրյանը, որպես նախարար, նույնպես երբեք չի երգել: «Չեմ փորձել»: Իզուր' Վազգենն ու Վանոն մաստեր-կլաս էին տալիս, մինչեւ հիմա նայելիս հուզում ենք ապրում: «Չէ, ես չեմ կարող երգել, մանավանդ էդ երգը' «Պառավ յարս թանկ է, թանկ»»: Գուցե միասի՞ն փորձենք: «Հետո. որ առիթ լինի, կփորձենք»,- ասաց ու երգից էլ արագ իջավ աստիճաններից, որ ազատվի մեր երաժշտական հետապնդումից: «Գնում եք պարապե՞ք»,- ձայնեցինք հետեւից: «Ո՛չ»,- կատեգորիկ ժխտեց լուրջ սոցապնախարարը: