«Հրապարակ». «Էյր Արմենիան»` նոր ազգային ավիափոխադրող

Մոտ 20 օր առաջ «Էյր Արմենիա» ընկերությունը քաղավիացիայի վարչությունից թույլտվություն է ստացել 6 ուղղություններով թռիչքներ իրականացնելու եւ, փաստորեն, ավիափոխադրող ընկերության կարգավիճակ է ստացել: Այս մասին երեկ «Հրապարակ»-ին հայտնեց քաղավիացիայի մամուլի պատասխանատու Նելլի Չերչինյանը՝ հավաստիացնելով, որ սա ժամանակավոր թույլտվություն է, եւ առայժմ վաղ է պնդել, թե «Էյր Արմենիան» զբաղեցնելու է «Արմավիայի» տեղը:

Սակայն, նկատի ունենալով, որ այդ 6 ուղղությունները՝ Մոսկվա, Սոչի, Կրասնոդար, Ռոստով, Սանկտ Պետերբուրգ եւ Սամարա, առավել շահութաբեր թռիչքագծերն են, կարելի է ենթադրել, որ վերջերս տարածվող խոսակցություններն այն մասին, թե «Էյր Արմենիան», որը 2003-ից զբաղվում էր միայն բեռնափոխադրումներով, լինելու է մեր նոր ազգային ավիափոխադրողը, այնքան էլ անհիմն չեն:

Այս ընկերությունը կապվում է ԱԺ պատգամավոր, արդարադատության նախկին նախարար Դավիթ Հարությունյանի եղբոր՝ Վահան Հարությունյանի անվան հետ: Մյուս կողմից, դեռեւս 2003 թվականից «Էյր Արմենիայի» շուրջ մութ խոսակցություններ էին պտտվում, թե այն ստացել էր լուծարված «Հայկական ավիաուղիներ» ընկերության գույքի, այդ թվում նաեւ օդանավերի վաճառքի իրավունքը, իսկ ինքնաթիռների գինն այն ժամանակ 4-8 մլն դոլար էր, եւ պետք է վճարեր «Ավիաուղիների» պարտքերն աշխատավարձերի գծով, ինչը չի արել: Եթե այդպես է, ապա ո՞ւմ ենք վստահում ազգային ավիափոխադրողի կարգավիճակը: Այս հարցերի շուրջ թերթի թղթակիցը զրուցեց «Էյր Արմենիայի» գործադիր տնօրեն Արսեն Ավետիսյանի հետ:

- Հնարավո՞ր է, որ Դուք զբաղեցնեք «Արմավիայի» տեղը եւ դառնաք ազգային ավիափոխադրող:

- Չենք բացառում, որ «Էյր Արմենիան» դառնա ազգային ավիափոխադրող, բայց կլինենք, թե չենք լինի, կախված է կառավարությունից, նրանից, թե ինչ հետագա զարգացումներ տեղի կունենան ավիափոխադրումների ոլորտում:

- Խոսակցություններ կան, որ կառավարությունը հրաժարվում է երեք ավիափոխադրող ունենալու գաղափարից, եւ պետք է որոշվի, որ մեկը լինի: Գուցե խոսքը Ձե՞ր ընկերության մասին է:

- Այդ հարցին չեմ կարող պատասխանել: Նայած թե ինչ քաղաքականություն կիրականացվի: Եթե մի քանի ավիափոխադրողներ լինեն, գուցեեւ մենք լինենք դրանցից մեկը: Գիտեք, երեւի, որ առայժմ խորհրդակցական ընկերություն է բացվել, որը պետք է ավիաշուկայի զարգացման վերաբերյալ խորհրդատվություն իրականացնի, որից հետո, եթե հայտարարվի ավիափոխադրողի մրցույթ, ապա կարող եմ ասել, որ մենք հաստատ կմասնակցենք: Ներկայումս 2 օդանավ ենք ձեռք բերում: Մեկը՝ «Ա-320», որը թռիչքներ կիրականացնի օգոստոսից, մյուսի վերաբերյալ դեռ բանակցությունները չեն ավարտվել: Հավանաբար, նույնպես «Ա-320» կլինի կամ «Ա-319»: Առայժմ փորձում ենք օգոստոսից կանոնավոր փոխադրումներ սկսել: Մի բան կարող եմ ասել, որ այսօր ավելի դժվար է մտնել շուկա, քան մի քանի ամիս առաջ, քանի որ երբ «Արմավիան» նոր էր դուրս եկել շուկայից, այնտեղ բաց էր առաջացել, իսկ հիմա այդ բացը մի քանի արտասահմանյան ընկերություններ են լրացրել, եւ մենք նորից պետք է մեր ուղեւորին հետ բերենք:

- Ճի՞շտ է, որ «Էյր Արմենիան» պատկանում է ԱԺ պատգամավոր Դավիթ Հարությունյանի եղբորը՝ Վահան Հարությունյանին:

- Վահան Հարությունյանն ընկերության 50 տոկոս բաժնեմասի տերն է: Մյուս 50 տոկոսը պատկանում է ինձ:

Մանրամասն՝ թերթի այսօրվա համարում