«Զվարթնոց» օդանավակայանի բաժնի պետ Վանիկ Թանգամյանը խոսել է եղբոր ինքնասպանության մասին

«Զվարթնոց» օդանավակայանի բաժնի պետ, ոստիկանության գնդապետ Վանիկ Թանգամյանը «Ժողովուրդ»–ի հետ զրույցում, մեկնաբանելով իր եղբոր՝ Ցոլակ Թանգամյանի ինքնասպանության դիմելու պատճառը, ասաց, թե ինքն այդ հետապնդումներից տեղյակ չի եղել։

Հիշեցնենք, որ Ց. Թանգամյանը ինքնասպանություն գործելուց առաջ նամակ էր գրել, որտեղ նշել էր, որ իրեն 1994թ.-ից հետապնդում են ոստիկանության նախկին պաշտոնյաներ Սամվել Հունանյանն ու Արթուր Վիրաբյանը՝ իրենից խլելով Կիևյան 2-ա հասցեի 176 քմ տարածքը։ Նամակում նա նաև գրել էր, թե այս անարդարությունից հետո ինքն այլևս չի կարող ապրել։

«Ժողովուրդ»–ը զրուցել է Վանիկ Թանգամյանի հետ՝ պարզելու, թե արդյոք ինքը, լինելով ոստիկան, տեղյակ է եղել եղբոր հետ կատարվածից։

–Պարոն Թանգամյան, Դուք, լինելով ոստիկանության բարձրաստիճան պաշտոնյա, ինչ կասեք Ձեր եղբոր ինքնասպանությունից առաջ գրած նամակի մասին, որտեղ նա նշել է, թե 1994թ.–ից իրեն հետապնդել են։

–Ես տեղյակ չեմ ոչ մի բանից։

–Ձեր եղբայրը Ձեզ ոչինչ չի՞ պատմել։

–Ո՞չ։

–Իսկ Դուք չէի՞ք հետաքրքրվել, թե ինչ վիճակում է Ձեր եղբայրը։

–Բիզնեսի վերաբերյալ հարցերի հետ կապված չեմ։ Ի՞նչ գործ ունեմ ուրիշի գործերին խառնվել։

–Բայց խոսքը Ձեր եղբոր մասին է։

–Գիտեմ, բայց տեղյակ չեմ ու չեմ խառնվել, ու նա էլ ինձ բան չի պատմել։

–Նա անուններ է տվել՝ Սամվել Հունանյան, Արթուր Վիրաբյան, այս անունները Ձեզ ոչինչ չե՞ն ասում։

–Սամվել Հունանյանին ճանաչում եմ, ո՞նց չեմ ճանաչում, նա մեր համակարգի աշխատող է։ Բայց հո աստղագուշա՞կ չեմ, որ իմանամ։

- Ձեր եղբայրն այս մարդկանց հետապնդումների և անարդարության հետևանքով գնաց այդ քայլին, Դուք՝ որպես ոստիկանության գնդապետ, ի՞նչ եք պատրաստվում անել։ Ո՞ւմ եք մեղադրում Ձեր եղբորն ինքնասպանության հասցնելու համար։

-Չեմ կարող ասել

Մանրամասները՝ «Ժողովուրդի» այսօրվա համարում։