«ՀԺ». Դեղերի փորձագիտական կենտրոնի հերթական անօրինականությունը

Առողջապահության նախարարությանը դեռևս անցած շաբաթ պետք է մատակարարվեր «Սելսեպտ» դեղամիջոցը, որի օգտագործումը ցուցված է երիկամների փոխպատվաստման ժամանակ:

Դեղամիջոցի մատակարարման մրցույթում հաղթել է «Վագա- ֆարմ» ընկերությունը: Պարզվում է, որ ներկրող այս ընկերությունը ճիշտ ժամանակին կատարել է իր պարտավորությունները և սահմանված ժամկետում ներկրել դեղամիջոցը: Իսկ թե ինչու՞ այն հասցեատիրոջը չի հասցվել, այնքան էլ չի տեղավորվում նորմալ տրամաբանության մեջ: Խնդիրն այն է, որ այդ դեղատեսակի հետ ընկերությունը ներկրել է նաև այլ դեղամիջոցներ, որոնց թվում նաև «Ռոցեֆին», որի փաթեթին ՝ բացի անգլերեն մակնշումից, լրացուցիչ առկա է նաև դեղի ազդող նյութի լատիներեն մակնշումը, որը լիովին համապատասխանում է օրենսդրության պահանջներին: Սա պատրվակ է դարձել, որ Դեղերի փորձագիտական կենտրոնը դեղը համարի չգրանցված՝ այս դեղի հետ արգելելով նաև նույն խմբաքանակով ներկրված բոլոր մյուս դեղերի ներմուծումը (այդ թվում՝ «Սելսեպտի», թեև այս դեղի հետ կապված որևէ խնդիր չկա):

Ներկայումս «Վագա-ֆարմ» ընկերությունը մրցույթի պայմաններն իբր չկատարելու համար օրական պետք է տուգանքներ վճարի:

«Հայկական ժամանակ»-ի թղթակցի հետ զրույցում «Վագա Ֆարմ» ընկերության տնօրեն Վահե Վարսանյանը ստեղծված իրավիճակին տվել է բավական կոշտ մեկնաբանություն:
«Հերթական այս դեպքը ցույց է տալիս, որ գործ ունենք բանականության բացակայության կանխավարկածի հետ: Այդ հիմնարկի ղեկավարությունը՝ Թոփչյան Հակոբի գլխավորությամբ, լրիվ իրեն կորցրել է: Նույնիսկ իմաստ չկա արդեն արձանագրել, որ տեղի է ունենում կամայականություն և անօրինականություն: Մեր հիմնական գործերը թողած՝ ժամանակը վատնում ենք դրանց կատարած անօրինականությունների պատճառով հասցված վնասների դեմն առնելով»:

Առավել մանրամասն՝ թերթի այսօրվա համարում