«Հրապարակ». Դիզվառելիքի չարաշահումների գործով առաջիկայում բավականին ուշագրավ նորություններ կհրապարակվեն

Գեղարքունիքի, Արարատի, Շիրակի եւ Կոտայքի մարզպետները դեռ շարունակում են անհոգ աշխատել անգամ այն բանից հետո, երբ այդ ոլորտներում պետական միջոցների հափշտակության փաստեր բացահայտվեցին: Միակ պատժվողն առայժմ Արարատի մարզպետարանի գյուղատնտեսության եւ բնապահպանության վարչության նախկին պետ Տիգրան Վիրաբյանն է: Հիշեցնենք, որ ՀՀ կառավարության որոշումներով հաստատված «ՀՀ հողօգտագործողներին մատչելի գներով դիզելային վառելանյութի ձեռքբերման նպատակով պետական աջակցության» 2012-2013թթ. ծրագրերի իրականացման գործընթացում պաշտոնեական դիրքն օգտագործելով եւ մի խումբ անձանց հետ նախնական համաձայնությամբ, առանձնապես խոշոր չափերով պետական միջոցների յուրացում կատարելու համար Տիգրան Վիրաբյանին մեղադրանք է առաջադրվել ՀՀ ՔՕ 179-րդ հոդվածի 3-րդ մասի 1-ին կետով եւ 314-րդ հոդվածի 1-ին կետով:

Վիրաբյանը 2 ամիս ժամկետով կալանավորվեց: Իսկ ֆինանսների նախարարության վերահսկողական տեսչությունը դեռեւս հունիսի սկզբին ստուգումների արդյունքում խոշոր չարաշահումներ էր բացահայտել մատչելի դիզվառելիքի բաշխման գործընթացում: Հատուկ քննչական ծառայությունում Արարատի, Գեղարքունիքի, Կոտայքի եւ Շիրակի մարզպետարանների պաշտոնատար անձանց կողմից կատարված յուրացման, պաշտոնեական կեղծիքի եւ պաշտոնեական դիրքի չարաշահման դեպքերի առթիվ հունիսի 21-ին ՀՀ քրեական օրենսգրքի 179-րդ հոդվածի 3-րդ մասի 1-ին կետով, 308-րդ հոդվածի 2-րդ մասով, 4-րդ հոդվածի 1-ին մասով հարուցվել էր քրեական գործ' կապված հողօգտագործողներին մատչելի գներով դիզելային վառելանյութ եւ ազոտական պարարտանյութ տրամադրելու ծրագրի հետ: Մեկուկես ամիս շարունակվող նախաքննության ընթացքում միակ ձերբակալվածը Արարատի մարզպետարանի չինովնիկն էր:

«Հրապարակ»-ի տեղեկություններով, առաջիկայում բավականին ուշագրավ նորություններ կհրապարակվեն, իսկ երեկվա դրությամբ Հատուկ քննչական ծառայությունից վստահեցրին, որ չկան այլ ձերբակալվածներ ու կալանավորվածներ: ՀՔԾ մամլո խոսնակ Միքայել Ահարոնյանը մեզ հետ զրույցում հայտնեց, որ նախաքննության ընթացքում հարցաքննվել են բազմաթիվ վկաներ, սակայն նախնական քննության տվյալների անթույլատրելիության մասին ՀՀ քրեական դատավարության օրենսգքրի պահանջներից ելնելով՝ վկաների ինքնության վերաբերյալ տեղեկություն չտրամադրեց: Նախաքննությունը շարունակվում է:

Առավել մանրամասն՝ թերթի այսօրվա համարում