«Հրապարակ». «ԳԱԻ»-ում տեղեկացված չեն եղել նոր կայանատեղիների մասին

Ամիսներ առաջ քաղաքապետարանի տրանսպորտի վարչության պետ Հենրիկ Նավասարդյանը «Այրարատ» տոնավաճառի դիմացի մայթին կայանող տաքսիստներին առաջարկել էր նոր կայանատեղի: Տաքսու վարորդները համաձայնել էին մեքենաները կայանել իրենց հատկացված տարածքում: «Մեքենաները կայանում էինք, ոչ մի խնդիր չկար, բայց որոշ ժամանակ անց տուգանվեցինք սխալ տեղում կայանելու պատճառով,-ասաց տաքսու վարորդ Ռաֆիկը՝ տեղեկացնելով: - Վստահ էինք, որ ճիշտ տեղում ենք կայանել, այդ իսկ պատճառով էլ թյուրիմացությունը վերացնելու, պարզաբանումներ ստանալու նպատակով դիմեցինք Ճանապարհային ոստիկանություն' «ԳԱԻ»»: Ճանապարհային ոստիկանության աշխատակիցները, կատարելով ուսումնասիրություններ, եկել են համոզման, որ վարորդները մեքենաները ճիշտ տեղում են կայանել, եւ տուգանքները չեղյալ են համարվել:

«Պարզվում է' «ԳԱԻ»-ում տեղեկացված չեն եղել նոր կայանատեղիների մասին, եւ տուգանքները թյուրիմացություն են եղել»,-ասաց Ռաֆիկը՝ հավելելով, որ այն վարորդները, ովքեր իրենց տուգանքները վճարել են, հնարավորություն կունենան գումարները ետ վերցնել, իսկ չվճարածներն էլ այլեւս չեն վճարի: Ըստ Ռաֆիկի, գումարները ետ գանձելու համար ժամանակ տրված չէ, միայն հարկավոր է համապատասխան ծանուցումով ներկայանալ Ճանապարհային ոստիկանություն:

Առավել մանրամասն՝ թերթի այսօրվա համարում