«Հրապարակ». «Հայէկոնոմբանկի» Արտաշատի մասնաճյուղի տարածքի վրա աչք դրած անձին խոստացել է աջակցել Հովիկ Աբրահամյանը

Սուքիասյանների ընտանիքին պատկանող «Հայէկոնոմբանկի» Արտաշատի մասնաճյուղի վարձակալած տարածքն ինչ-որ ազդեցիկ անձանց ախորժակ է գրգռել, անհայտ մի գնորդի, ով ուզում է ուղիղ վաճառքով գնել տարածքը: Այնպիսի լայն ծանոթություններ ունեն այդ անձինք, որ նրանց հաջողվել է դուրս գալ կառավարական օղակների վրա եւ այնպես անել, որ Պետգույքի կառավարման վարչությունը սառը պատերազմ սկսի «Հայէկոնոմբանկի» դեմ: Առաջին քայլն այն է եղել, որ վարձակալության ժամկետն ավարտվելուն պես քաշքշուկ է ստեղծել «Հայէկոնոմբանկի» հետ վարձակալության նոր պայմանագիր կնքելու շուրջ:

Վարչությունը «Հայէկոնոմբանկի» առաջ պահանջ է դրել, որ վերջինս պայմանագրային պարտավորություն ստանձնի' ազատել տարածքը երկու ամիս առաջ ծանուցելու դեպքում: Այս պայմանը վարչությունում բացատրում են նրանով, որ սկսվել է իրավական փաստաթղթերի կարգավորման եւ հստակեցման գործընթաց: Մինչդեռ բանկի ղեկավարությունը համոզված է, որ Արտաշատի բաժանմունքն ուզում են խլել իրենցից, քանի որ երկու ամիսը քիչ է նոր տարածք ձեռք բերելու, կահավորելու, արագ վերակազմավորվելու համար, եւ բանկերի միջեւ ներկա սուր մրցակցության պայմաններում իրենք եւ իրենց հաճախորդներն ահռելի վնաս կկրեն: Բանկի պատասխան քայլն այն է եղել, որ վերջինս, օգտվելով վարձակալի նախապատվության իր իրավունքից, դիմել է կառավարություն' Արտաշատի մասնաճյուղի տարածքը սեփականաշնորհելու խնդրանքով: Ներկայումս բանկն զբաղեցնում է Արտաշատի Աթարբեկյան փողոցում գտնվող շենքի առաջին հարկը: Երկրորդ հարկը վիճակագրության ծառայությանն է պատկանում:

Իրավիճակին «Հրապարակ»-ն անդրադարձել էր մեկ ամիս առաջ: Նաեւ հայտնել էր, որ զրույցներ կան, թե «Հայէկոնոմբանկի» մասնաճյուղի տարածքի վրա աչք դրած անձին խոստացել է աջակցել ԱԺ նախագահ Հովիկ Աբրահամյանը եւ ակտիվորեն աշխատում է այս ուղղությամբ, ինչը նրա մամուլի քարտուղար Գոհար Պողոսյանը կտրականապես հերքում է: Երեկ «Հայէկոնոմբանկի» գործադիր տնօրեն Արմեն Նալջյանից հետաքրքրվեցինք, թե ինչ է փոխվել այս մեկ ամսում, եւ արդյո՞ք հաջողվել է սեփականաշնորհման թույլտվություն ստանալ: Նա պատասխանեց, որ բանկն արդեն մեկ ամիս է, ինչ բանակցություններ է վարում Պետգույքի կառավարման վարչության պետ Արման Սահակյանի հետ, սակայն այս մեկ ամսում առայժմ ոչինչ չի փոխվել:

Առավել մանրամասն՝ թերթի այսօրվա համարում