Վարչապետն ուզում է սեփական կուսակցություն ունենալ

Հանրային խորհրդի նախագահ Վազգեն Մանուկյանի ԱԺՄ կուսակցությունը կրկին փորձում են վերակենդանացնել: Առաջիկայում հանդիպումներ կլինեն կուսակցության նախկինում պոկված բեկորների ղեկավարների հետ, ինչպես նաև երիտասարդներ կներգրավվեն: ԱԺՄ նախագահ Վազգեն Մանուկյանը 2011 թվականին ևս նույն մտադրություններն ուներ, և անգամ հանդիպումներ եղան նախկին ԱԺՄ-ականներ՝ ԱԺԿ նախագահ, ՀՀ փոխարտգործնախարար Շավարշ Քոչարյանի, ԱԺԴ նախագահ Արշակ Սադոյանի և ՀԺԱՄ նախագահ Սեյրան Ավագյանի հետ՝ միասնական քաղաքական միավոր ձևավորելու նպատակով, բայց գործը գլուխ չեկավ: Ինչպես 2 տարի առաջ, այնպես էլ հիմա խոսակցություններ կան, որ ԱԺՄ-ն վերակենդանացնելու գործընթացը տեղի է ունենում մեկ այլ նախկին ԱԺՄ-ականի՝ ՀՀ վարչապետ Տիգրան Սարգսյանի մասնակցությամբ, ով ուզում է սեփական կուսակցություն կամ քաղաքական հենարան ունենալ և առաջիկա խորհրդարանական ընտրություններին մասնակցել ոչ թե ՀՀԿ-ի, այլ ԱԺՄ-ի հետ:

«Հրապարակ»-ը զրուցեց նաև Վազգեն Մանուկյանի հետ, որը ներկայացնում ենք ստորև:

- Պարոն Մանուկյան, խոսակցություններ կան, որ ԱԺՄ-ն ուզում եք վերականգնել…

- Այո, կա նման մտադրություն, բայց գործընթաց դեռևս չի սկսվել:

- Պարոն Մանուկյան, երկու տարի առաջ էլ նույն ծրագիրն ունեիք, անգամ հանդիպումներ եղան, բայց ոչինչ չստացվեց:

- Այո, մի պահ եկավ, որ ԱԺՄ-ից պոկված բոլոր բեկորներս ցանկանում էինք միասնական հանդես գալ, այդպիսով պատրաստվում էինք 2012թ. ԱԺ ընտրություններին, բայց քննարկեցինք և հասկացանք, չտեսանք ԱԺ ընտրություններին որևէ լուրջ շանս, և դրա համար միավորվելու ոգևորությունը մի փոքր իջավ: Այդուհանդերձ, կարող եմ ասել, որ քաղաքական իրավիճակն այժմ այնպիսին է, որ ԱԺՄ-ի նման կուսակցության անհրաժեշտությունը կա, պահանջված է: Կկարողանա՞մ ես կամ մենք դա անել, սա թերևս այլ հարց է, բայց ես զգում եմ, որ այդ տեղը դատարկ է:

- Պարոն Մանուկյան, քաղհասարակությունը վերջին ամիսներին աննախադեպ ակտիվացել և որոշակի հաղթանակներ է գրանցել (ի դեպ, որին նաև Ձեր աջակցությունը հայտնեցիք Դուք), մինչդեռ կուսակցությունները կարծես ընդհատակ են անցել, չեք կիսո՞ւմ քաղաքացիական ակտիվ զանգվածի տեսակետն այն մասին, որ քաղաքական կուսակցությունների գոյությունը մեր երկրում այլևս արդարացված չէ, դրանք անիմաստ կառույցներ են:

- Ոչ, ճիշտ չէ: Ընդհանրապես ամբողջ աշխարհում հիմա փոփոխություններ են կատարվել, և քաղաքական դասական կուսակցությունները ճգնաժամ են ապրում: Կազմակերպման նոր ձևեր առաջացան, որոնք, ինձ թվում է՝ կուսակցական հարցում դժվար թե օգնեն: Խոսքը համացանցային ձևերի մասին է, օրինակ, հակագլոբալիստները, որոնք միմյանց հետ կապվում են միայն «Ֆեյսբուքով», չունեն մշտական կառույց, իրենք կարողանում են հավաքվել ցանկացած տեղ և ցույցեր կազմակերպել բոլոր այն վայրերում, որտեղ քսան խոշոր երկրների ղեկավարները հավաքվում են: Ոմանք, որոշ մասնագետներ դրսում կարծում են, որ դա է ապագան, ես նրանց հետ համաձայն չեմ, բայց նաև կարծում եմ, որ կուսակցության գաղափարը որոշ դեպքերում կվերափոխվի: Մի բան հստակ է, որ հին կուսակցությունների ձևերն իրենց սպառել են ոչ միայն Հայաստանում, այլև ամբողջ աշխարհում: Թեպետ Հայաստանում, եթե անգամ հին կուսակցություններով գեղական ձևով պայքարենք, էլի նորմալ է:

Առավել մանրամասն՝ թերթի այսօրվա համարում