Շուշիին նվիրված գրքի շնորհանդես՝ Նարեկացի արվեստի միությունում

Նարեկացի արվեստի միությունում օգոստոսի 7-ին ժամը 19:00-ին կկայանա Հայդուկ Շամլյանի «Շ» գրքի շնորհանդեսը: (բանաստեղծությունների ժող. , հրատ.՝ «Ալպաթրոս», Արցախ ,2013.-122 էջ)

Գիրքը Նարեկացի արվեստի միության Շուշիի կենտրոնի արդեն 2-րդ համատեղ հրատարակությունն է:

Այն նվիրված է Շուշիին՝ նրա բոլոր կողմերով հանդերձ: Հայդուկ Շամլյանը փորձել է ներկայացնել այդ գողտրիկ քաղաքն իր լուսավոր իրականության մեջ:

Գիրքը հնարավորություն է տալիս ճանաչել Շուշին ներսից՝ իր մոգական հմայքով հանդերձ՝ չկենտրոնանալով քաղաքի խնդիրների և դժվարությունների վրա:

Հայդուկ Շամլյանը մասնագիտությամբ իրավաբան է, նաև հրապարակագիր: Ունի հրապարակված երեք գրքեր, որոնցից երկուսը բանաստեղծությունների ժողովածուներ են, դրանցից մեկը հրատարակվել է Ստեփանակերտում:

Հայդուկ եւ Աիդա Շամլյանները դեռևս 2004թ. այցելել են Արցախ և սիրահարվել այդ հողին ու ջրին: Աիդա Շամլյանի նախաձեռնությամբ Շուշիում հիմնադրվել է «Արամ Մանուկյան» ճամբարը, որոնց մասնակից երեխաների թիվը տարեցտարի աճում է՝ հասնելով 400-ի:
Ճամբարի գաղափարախոսությունն եղել և մնում է «Մեկ ազգ, մեկ հայրենիք, մեկ ժողովուրդ, մեկ պետություն» սկզբունքը: