«Ավելի մաքուր Երևանը» Ծիծեռնակաբերդի տարածքում էր. մասնակցել է նաև ՀՀ-ում ԱՄՆ դեսպանը (լուսանկարներ)

Արձագանքելով Երևանի քաղաքապետ Տարոն Մարգարյանի կոչին՝ հասարակական և երիտասարդական կազմակերպությունների, երկրապահ կամավորականների և վետերանների միության հարյուրավոր անդամներ, նաև զինծառայողներ ու քաղաքապետարանի ենթակայության տարբեր կազմակերպությունների աշխատակիցներ են մասնակցել «Ավելի մաքուր Երևան» ծրագրի շրջանակում Ծիծեռնակաբերդի' շուրջ 110 հեկտար տարածքի մաքրման աշխատանքներին:

Նկատելով տարածքում իրականացվող մաքրման աշխատանքները՝ ՀՀ-ում ԱՄՆ արտակարգ և լիազոր դեսպան Ջոն Հեֆերնը ևս հանպատրաստից որոշել էր մասնակցել Երևանն ավելի մաքուր դարձնելու աշխատանքներին: Քաղաքապետարանի կողմից ապահովվել են մաքրման համար անհրաժեշտ բոլոր պարագաներն ու համապատասխան տեխնիկա:

Ծիծեռնակաբերդում շրջել և ընթացող աշխատանքներին տեղում հետևել է Երևանի քաղաքապետի առաջին տեղակալ Կամո Արեյանը: Ամփոփելով ծրագրի մեկնարկից մինչ օրս իրականացված աշխատանքների արդյունքները' Կամո Արեյանը շնորհակալություն է հայտնել նախաձեռնությանը աջակից բոլոր կառույցներին և կազմակերպություններին:

««Ավելի մաքուր Երևան» ծրագիրը երևանցիներին ուղղված կոչ է՝ ընդհանուր օգտագործման այն տարածքները, որոնք ծառայում են բոլորին, ավելի մաքուր դարձնելու և ավելի մաքուր պահելու համար: Առաջիկայում նախատեսում ենք մաքրման աշխատանքներ իրականացնել Նոր Նորք վարչական շրջանի Սուրբ Սարգիս եկեղեցու և Հայորդաց տան հարակից, արդեն ծառապատ հատվածներում, նաև Արաբկիր վարչական շրջանի մանկական զբոսայգու և Քանաքեռ ՀԷԿ-ի հարակից տարածքներում: Այնուհետ աշխատանքներ կշարունակվեն մյուս վարչական շրջաններում»,-ասել է Կամո Արեյանը:

Նկատենք, որ մինչ օրս ծրագրի շրջանակում իրականացվող աշխատանքներին մասնակցել է ավելի քան 2500 կամավոր: «Ավելի մաքուր Երևան» ծրագրի շրջանակում մաքրվել և պատշաճ տեսքի են բերվել Հրազդանի կիրճի, Հաղթանակ զբոսայգու, «Կարմիր բլուր» հնավայրի, «Էրեբունի» պատմահնագիտական արգելոց-թանգարանի և «Փարոս» անտառպուրակի հարակից տարածքները:

Երևանի քաղաքապետարանի տեղեկատվության և հասարակայնության հետ կապերի վարչություն