Ամփոփվեց «Սփյուռք» ամառային դպրոց 2013թ. ծրագիրը

Օգոստոսի 2-ին Ծաղկաձորի երիտասարդական կենտրոնում տեղի ունեցավ ՀՀ սփյուռքի նախարարության «Սփյուռք» ամառային դպրոց 2013թ ծրագրի հանդիսավոր փակման արարողությունը:

ՀՀ սփյուռքի նախարարի տեղակալ Վահե Ջիլավյանը, շնորհավորելով ծրագրի մասնակիցներին դասընթացի հաջող ավարտի կապակցությամբ, նշեց, որ ավարտվեց ամառային դպրոցի 2013թ ծրագիրը, սակայն hայապահպանությանն ուղղված այս ծրագրի արդյունքները ակնհայտ կդառնան, երբ մասնակիցները վերադառնան իրենց բնակության երկրներ և կիրառեն այն գիտելիքներն ու հմտություններն, որոնք ձեռք բերեցին «Սփյուռք» ամառային դպրոցում:

Ողջույնի խոսքով հանդես եկավ և ծրագրի մասնակիցներին շնորհավորեց Կոտայքի մարզպետի տեղակալ Կարեն Մարգարյանը՝ նշելով, որ մեծ պատիվ է հայապահպանությանն ու հայրենաճանաչությանն ուղղված այս ծրագիրն իրականացնել գեղատեսիլ Ծաղկաձորում: Ծրագրի մասնակիցներին իր աղջույնի խոսքն էր հղել նաև Ծաղկաձորի քաղաքապետ Արթուր Հարությունյանը:

ԵՊՀ միջազգային կրթական կենտրոնի հանրակրթական առարկաների ամբիոնի վարիչ, դոցենտ, «Սփյուռք» ամառային դպրոցի բովանդակային մասի պատասխանատու Կամո Աթայանն իր խոսքում նշեց, որ ԵՊՀ-ից և Սփյուռքից ժամանած շուրջ 70 հայտնի ուսուցիչներ, դասախոսներ, պրոֆեսորներ արեցին ամեն ինչ, որպեսզի ամառային դպրոցը կայանա և կատարի իր առաքելությունը:

Ծրագրի փակման արարողությանը հաշվետու համերգային ծրագրով հանդես եկան «Սփյուռք» ամառային դպրոցի ազգային երգի և պարի դասընթացների մասնակիցները: Հայոց լեզվի արագացված դասընթացների մասնակիցները ներկայացրեցին իրենց սովորած հայրենասիրական ստեղծագործությունները:

Հանդիսության ավարտին ՀՀ սփյուռքի նախարարության կողմից մասնակիցներին հանձնվեցին ծրագրի մասնակցության հավաստագրերը:

Հիշեցնենք՝ ՀՀ սփյուռքի նախարարության «Սփյուռք» ամառային դպրոցն իրականացվում է Երևանի պետական համալսարանի հենքի վրա և ներառում է 5 ուղղություն՝ Հայոց լեզվի արագացված դասընթացներ, Սփյուռքի ուսուցիչների վերապատրաստման դասընթացներ, Սփյուռքահայ երիտասարդ առաջնորդների դասընթաց, Սփյուռքի լրագրողների դասընթաց, Ազգային երգի ու պարի դասընթաց: Ծրագիրն ամենամյա է և շարունակական: