«Միկան» ներկայացրեց նորեկներին (ֆոտո)

«Միկա» ակումբի մամուլի սրահում տեղի ունեցավ թիմի գլխավոր մարզիչ Արամ Ոսկանյանի ասուլիսը եւ «Միկայի» նորեկներ՝ դարպասապահ Գոռ Էլյազյանի, պաշտպան Հայկ Իշխանյանի, կիսապաշտպաններ Լեւոն Պաչաջյանի եւ Սարգիս Կարապետյանի շնորհանդեսը:

«Միկայի» մամուլի քարտուղար Աշոտ Մարտիրոսյանը լրագրողներին ներկայացրեց թիմի նորեկների եւ նրանց հանձնեց «Միկայի» մարզաշապիկները, տեղեկացնում է ակումբի պաշտոնական կայքը:

Նորեկները նաեւ իրենց խոսքն ասացին:

- «Իմպուլսի» լուծարումից հետո, մինչեւ «Միկա» տեղափոխվելը մարզվել եմ «Բանանցում»,- ասաց Գոռ Էլյազյանը:- «Փյունիկում» չեմ մարզվել: Առաջարկ էր եղել «Փյունիկումից», «Բանանցից»: Սակայն մարզչի ցանկությամբ եւ վստահությամբ որոշեցի տեղափոխվել «Միկա»:

- «Միկայում» ինձ շատ լավ ընդունեցին,- ասաց Սարգիս Կարապետյանը:- Պատանեկան տարիների տարբեր տարիքային հավաքականների կազմում խաղացել եմ տղաներից շատերի հետ, ճանաչում եմ նրանց եւ հեշտ էր ընտելանալ թիմին:

- Կաշխատեմ իմ լավ որակներով օգնել թիմին,- ասաց Լեւոն Պաչաջյանը:- Ինչպես միշտ ամեն խաղի կնվիրվեմ ամբողջությամբ, եթե մարզիչները վստահեն, հուսով եմ ակումբին կկարողանամ օգտակար լինել:

Այնուհետեւ «Միկայի» գլխավոր մարզիչ Արամ Ոսկանյանը պատասխանեց լրագրողների հարցերին:

-Եվրոպայի լիգայի խաղերի ժամանակ հստակ երեւաց, որ թիմը հարձակման գծում խնդիրներ ունի: Առաջնությունն արդեն մեկնարկում է, այդ խնդիր կկարողանա՞ք լուծել

- Հուսանք, որ կկարողանանք: Բայց բազմիցս ասել եմ, որ գոլ խփելը դա զուտ հարձակվողի խնդիր չէ: Ժամանակակից ֆուտբոլում հարձակմանը մասնակցում են միանգամից 6-7 ֆուտբոլիստ: Պարզապես մեր հարձակվողական խաղի մեջ որոշ խնդիրներ կային, գոլային պահերը չկարողացանք իրացնել: Դա մեր ցավոտ հարցն է: Դարձյալ անդրադառնում ենք այդ խնդրին եւ, կարծես վերքի վրա աղ լցվի: Ուզում են դա մռանալ: Հուսով եմ,որ առաջնությունում բազմաթիվ գոլեր կխփենք ու նաեւ քիչ բաց կթողնենք, քան նախորդ առաջնությունում էր:

-Ի՞նչ տրամադրվածությամբ եք մոտենում առաջնության մեկնարկին:

-Տրամադրությունն ու տրամադրվածությունը շատ լավ է: Այսօր մարզումից առաջ էլ տղաներին ասացի, որ միշտ առաջնության մեկնարկից առաջ մեծ աշխատանք է տարվում, ծանրաբեռնվածությունը մեծ է եւ այդ առումով երբեմն հոգնացուցիչ մարզումներ են լինում: Առաջնութան ընթացքը երկար է ու ֆուտբոլիստների ֆիզիկական վիճակը բարելավելու համար անհրաժեշտ են այդ մարզումները: Տղաները լավ տրամադրությամբ են դուրս գալիս մեկնարկի

- Իսկ թիմը պատրա՞ստ եք առաջնությանը:

-Այո, թիմն ամբողջովին պատրաստ է: Եթե նկատել եք մեր թիմում տարիքային առումով համամասնությունը պահպանվել է: Ունենք եւ փորձառու ֆուտբոլիստներ եւ միջին տարիքի եւ երիտասարդ խաղացողներ: Մեր նորեկների պարագայում էլ այդ համամասնությունը պահպանվել է: Ունենք փորձառու ֆուտբոլիստ Լեւոն Պաչաջյանը, ֆուտբոլիստի համար լավ տարիք ունեցող Հայկ Իշխանյանը եւ Սարգիս Կարապետյանը, որոնք 23 տարեկան են եւ երիտասարդ դարպասապահ Գոռ Էլյազյանը: Սելեկցիոն աշխատանքները տանելիս այդ սկզբունքը մեր թիմը պահպանել է: Մենք իզուր չենք կանգ առել այս ֆուտբոլիստների ընտրության վրա: Ասեմ, որ շատ ֆուտբոլիստներ են ցանկացել հանդես գալ “Միկայում” ու հիմա էլ ցանկանում են: Մեր նորեկների համար սա մեծ պատիվ է, նաեւ ակումբի համար է մեծ պատիվ, քանի որ մեզ մոտ առաջնայինը թիմի պատրոտիզմն է, այսինքն՝ նվիրվածությունը թիմին: Ասեմ, որ հենց դրա շնորհիվ “Միկան” նախորդ մրցաշրջանում հաջողությունների հասավ: Երկրորդ տեղը թիմի համար մեծ հաջողություն էր: Մենք շատ ենք կարևորում նման ասուլիսները, ես կցանկանայի, որ շատ հարցեր ուղեիք ֆուտբոլիստներին, քանի որ դա կավելացնի նրանց պատասխանատվությունը: Խաղերից հետո միայն մամուլի ասուլիս տալիս է գլխավոր մարզիչը: Եթե որեւէ ֆուտբոլիստի մի հարց եք տալիս, ապա նա իր ասացին գերի է դառնում եւ պետք է առաջնության ընթացքում այն ինչ ասել է, իրագործի: Այդ առումով շատ հաճելի էր այսօրվա ասուլիսը եւ օգտակար:

{gallery}mik1{/gallery}