Պետք չէ փնտրել ատելու պատճառներ, եթե սիրելու հիմքեր կան. Լարա Ֆաբիան

Լարա Ֆաբիանը (Lara Fabian) հրաշալի համադրություն է Ուիթնի Հյուսթոնի անկեղծության, Սելին Դիոնի ռոմանտիկ էության և Մրայա Քերիի սիրունատեսության: Երաժշտական քննադատները նրան ճանաչել սկսեցին համեմատություններով, իսկ այսօր միաձայն պնդում են, որ Լարա Ֆաբիանը գրեթե անշփոթելի է: Նրա երգերից անբաժան են կանացի համեստությունը, նրբությունը, երբեմն փխրուն, բայց պայքարող ու չընկճվող հոգու պոռթկումները: Երգերի բառերի հեղինակն էլ գրեթե միշտ հենց ինքը' Լարա Ֆաբիանն է: «Երբ ստեղծագործում եմ, ես մոռանում եմ ամեն ինչ և բոլորին, ինձ պարուրում են միայն իմ հույզերը, մտքերն ու ապրումները: Երբեք չեմ կարող գրել մի բան, որը չեմ զգում»,- ասում է Ֆաբիանը:

Այս ինքնատիպ երգչուհին տարբերվում է համաշխարհային մյուս փոփ աստղերից նաև նրանով, որ իր ելույթներում չի օգտագործում բեմական շքեղ դեկորացիաներ, պարային խմբեր: Նա բեմ է բարձրանում հաճախ խիստ դասական հագուստով' օգտագործելով քիչ քանակությամբ զարդեր և նուրբ, գրեթե աննշան շպար: Կարծես ուրիշ ոչինչ նրան պետք չէ: Հզոր ու դրամատիկ ձայնի տիրապետող Ֆաբիանին հասու են երաժշտական բոլոր ժանրերը' ֆրանսիական շանսոնից մինչև օպերային արիաներ: «Ես ձգտում եմ երգել այնպես, ինչպես մայրս էր դա անում: Դեռևս չի ստացվում: Նա հրաշալի ձայն ուներ»,- մի առիթով ասել է երգչուհին:

Այս տարի հունվարի 9-ին Լարա Ֆաբիանը դարձավ 42 տարեկան: «Ես դարձել եմ ավելի ուժեղ, ինձ այլևս չեն խոցում քննադատություններն ու ծաղրը: Ես հավատում եմ, որ իմ կյանքը դեռ նոր է սկսվում….»:

Նրանք, ովքեր մեզ չեն գնահատում, միևնույնն է, չեն կարող զրկել մեզ երջանկությունից' անելու այն, ինչ մենք սիրում ենք և սիրել այն, ինչ մենք անում ենք:

Ես այլևս չեմ փնտրում արքայազնի, քանի որ ինքս էլ արքայադուստր չեմ:

Ինչքան էլ ես սիրեմ, միևնույնն է, իմ կարծիքով դա շատ ավելի քիչ է, քան ես կարող եմ:

Երեխաներն ամեն ինչի սկիզբն են և ամեն ինչի վերջը կարող են լինել, եթե հոգ չտանես նրանց մասին:

Տղամարդիկ բոլորովին պահանջ չունեն սիրված լինելու, ինչպես կանայք: Ինձ մոտ այնպիսի տպավորություն է, որ նրանք ուզում են սիրված լինել իրենց ազատության հետ միասին, որը թույլ չի տա նրանց ենթարկվող զգալ:

Երբեք պետք չէ փնտրել պատճառներ ատելու համար, եթե սիրելու հիմքեր կան:

Մարդու գեղեցկությունն իր յուրօրինակության մեջ է:

Սիրել մարդուն նշանակում է սիրել նրան այնպիսին, ինչպիսին նա կա: Նրանք, ովքեր միայն լավ բաների համար են սիրում, երբեք չեն կարող իսկապես սիրել:

Մանրամասները` այստեղ: