Կեղծ է ամէն մի գրականութիւն, բարոյական, քաղաքական վարդապետութիւն, որ ուժ եւ արիութիւն չէ ներշնչում. Գարեգին Նժդեհ

Արիութի՛ւն:

Միակ ճշմարիտ կրօնը, առանց որի ոչինչ արժեն կրօնները:

Կեղծ է ամէն մի գրականութիւն, բարոյական, քաղաքական վարդապետութիւն, որ ուժ եւ արիութիւն չէ ներշնչում իր դաւանողին:
Դատապարտելի է ամէն մի դպրոց, եկեղեցի, կուսակցութիւն, որը արիադաւան եւ արի չէ դարձնում մարդը՝ որպէս անհատ եւ հաւաքականութիւն:

Արիութի՛ւն - միակ ճշմարիտ բարոյականը:

Կորցնելով իրենց արիութիւնը - իմա իրենց դրական բոլոր առաքինութիւնները - ժողովուրդները կորցնում են իրենց գոյութեան բարոյական իրաւունքը: Անարին կորցնում է պատմութիւնից իրեն տրւած մասնաւոր առաքելութիւնը՝ իրագործելու մարդկային ցեղին օգտակար լինելու կարելիութիւնը: Այդպիսին դառնում է ընդունակ միայն անստեղծագործ եւ անփառունակ կեանքի, կարօտ՝ արտաքին օգնութեան: Նմանը ժամանակի ընթացքում դառնում է միջազգային պարազիտ, մինչդեռ ժողովուրդների կոչումն է լինել միջազգային արժէք եւ ազդակ:

Այդ տխուր եւ անարգական վիճակից ազգերին հեռու է պահում արիապաշտութիւնը:

Արիութի՛ւն, ժողովուրդներին բարոյապէս նեխելու վտանգից փրկող հոգեւոր աղն է դա:

Երբ կայ դա, չկայ վատը, ստորը կամ առնւազն աննշան է դառնում սրանց ազդեցութիւնը՝ անհատի թէ ժողովուրդների կեանքում:

Բարոյական արեւ է դա, որ կառողջագործէ իր շրջապատը: Երբ կայ դա, կայ ե՛ւ մեծագործութիւն, ե՛ւ վեհութիւն, ե՛ւ անձնըւիրութիւն: Պակասո՞ւմ է դա՝ այլեւս ոչինչ արժեն բարձր գաղափարները, ծրագիրները, տեսութիւնները, քանզի պակասում է նրանց իրականացնող ուժը: Անարիութի՛ւն, ասել է՝ հոգեւոր սնանկութիւն:

Անարին ոչինչ է աւելացնում աշխարհի անկորնչելի հարստութեան: Դա յաճախ բարոյական մուրացիկ է, այլոց ճիգերից օգտըւող: Անարին չէ ծառայում մարդկային քաղաքակրթութեան: Ինքնապաշտպանութիւն. ահա մեր նոր կրօնը: Երիցս խղճալի է այն ժողովուրդը, եթէ նրա ռազմիկները խոր համոզմամբ չեն կրկնում, թէ «ամենաանառիկ բերդերն իսկ կառուցւած են գրաւելու համար»: Չկան կուսակցական նահատակներ ու հերոսներ, կան եւ կը մնան ազգային մարտիրոսութիւնը եւ հերոսականը:
Վախկոտներն են արիացնում, ուժեղացնում թշնամուն, սրանք են հեշտացնում թշնամու գործը:
Մի բանակ, որն յաղթել է մահւան վախը, անպարտելի է եւ ամենակարող:

աղբյուրը` «Ալիք» օրաթերթ

Նյութը պատրաստեց` Ք. Ա-ն