Այսօր դերասանուհի Վիոլետա Գևորգյանի ծննդյան օրն է ﴾տեսանյութ﴿

«Մեր գրականության մեջ ու թատրոնում ժողովրդի մարդու, հատկապես հայ կնոջ կերպարը դեռ չի հասել այս ճշմարտությանը և գեղարվեստական ընդհանրացման այս ուժին ու ծավալին: Վիոլետա Գևորգյանը բացառիկ արդյունքի է հասել և  կարծես անմտադիր, անսպասելի մի պոռթկումով  ﴾դերը պատրաստել է շատ կարճ ժամանակում﴿  և բռնել է դերասանական կերպավորման ամենապարզ ու ճշմարիտ ճանապարհը: Նա ոչ թե գաղափար է խաղում, այլ վերարտադրում է կոնկրետ վիճակներ մարդկային որոշակի բնավորության ու տիպի սահմաններում»:

Հենրիկ Հովհաննիսյան

Դերասանուհի Վիոլետա Գևորգյան ծնվել է 1944թ. օգոստոսի 5-ին, Երևանում:

Իր ստեղծագործական ուղին 24 տարեկանում' ավելի քան 20 դերեր է խաղացել Երևանի Հ.Ղափլանյանի անվան պետական դրամատիկական թատրոնում։ Առաջին գլխավոր դերը եղել է «Աննա Ֆրանկի օրագիրը» պիեսում: Նրան ճանաչում է բերել Աղունի դերակատարումը Հրանտ Մաթևոսյանի «Աշնան արև» պիեսում: 1980թ. առաջին անգամ բեմադրված այս ներկայացման մեջ խաղացել է շուրջ 700 անգամ: Նկարահանվել է ֆիլմերում` «Տատիկի թոռնիկը» (1979թ.), «Ապրեք երկար» (1979թ.), «Այդքան սպասվող օրը» (1980թ.), «Վառած լապտեր» (1983թ.) և այլն:

1987թ. արժանացել է ՀԽՍՀ ժողովրդական արտիստի կոչմանը: 1988թ. մասնակցել է Բաքվի կինոփառատոնին և արժանացել արվեստագետ գործընկերների խիստ քննադատությանը: Նրա խոսքերով' մեկնել էր Բաքու, որպեսզի բոլոր ազգերի ներկայացուցիչներին պատմի Սումգաիթում հայ ազգի դեմ տեղի ունեցող վայրագությունների ու ջարդերի մասին, սակայն դերասանուհուն Հայաստանում համարեցին դավաճան, որն էլ պատճառ հանդիսացավ, որ նա 1991թ. տեղափոխվի ԱՄՆ, որտեղ էլ բնակվում է այսօր: ԱՄՆ-ում ժամանակ առ ժամանակ բեմ է բարձրացել և մասնակցել տարբեր ներկայացումների: Խաղացել է Տաթևիկ Ղափլանյանի բեմադրած «Իմ քաղցր տղան» ներկայացման մեջ` նվիրված Ղափլանյանի վաղամեռ որդուն: Խաղացել է նաև մի քանի էպիզոդիկ դերեր ամերիկյան տարբեր սերիալներում` «Ընդհանուր հիվանդանոց», «Վեց ոտնաչափ ներքև» և այլն: 2004թ. այցելել է Երևան, սակայն չի մասնակցել դրամատիկական թատրոնի ոչ մի ներկայացմանը: Երբ թատրոնի անձնակազմը այցելում է ԱՄՆ, Վիոլետան նրանց հետ հանդես է գալիս: