Առցանց խորհրդակցություն ԱԻՆ-ում

Այսօր ՀՀ ԱԻ նախարարությունում տեղի է ունեցել ամենշաբաթյա խորհրդակցություն, որը վարում էր նախարար Արմեն Երիցյանը։

Առաջին անգամ խորհրդակցությանն առցանց (օն-լայն) մասնակցում էին նաև ԱԻՆ Արմավիրի և Կոտայքի մարզային ստորաբաժանումների ղեկավարները։

Խորհրդակցության ընթացքում ՓԾ տնօրեն, գեներալ-մայոր Ս. Ազարյանը զեկուցեց շաբաթվա ընթացքում գրանցված արտակարգ դեպքերի ու ձեռնարկված միջոցառումների մասին։ ՓԾ տնօրենը նշեց նաև, որ հանրապետության տարբեր մարզերում և մայրաքաղաքում անցկացվել են տարաբնույթ ուսումնավարժություններ։

Ճգնաժամային կառավարման պետական ակադեմիան շարունակում է Լուսակերտի ուսումնական կենտրոնի կառուցապատման աշխատանքները։ Այնտեղ կառուցվում են երկաթուղային, ճանապարհատրանսպորտային և օդային վթարների նմանակման վարժահրապարակներ` գործնական պարապմունքների համար։ Հարմարություններ կստեղծվեն նաև ԱԻՆ օդադեսանտային փրկարարական ջոկատի մարզումների համար։

Հակակարկտային ծառայությունը («ՄԵՎԱՆԾ» ՊՈԱԿ)` փոխնախարար Դ. Կարապետյանի հետ համատեղ բանակցություններ է վարում արտերկրից նոր ռադիոտեղորոշիչ կայաններ ձեռք բերելու ուղղությամբ։

Խորհրդակցության ընթացքում ԱԻ նախարարին զեկուցեցին նաև, որ քաղաքացիական պաշտպանության պահանջներին համապատասխան ազդարարումն ապահովելու համար ընտրվել է տարբեր նշանակության 8 փորձնական օբյեկտ Երևանում և մարզերում։ Նախատեսված է տեղերում առկա տարբեր ազդարարման համակարգերը կիրառել քաղպաշտպանական նպատակների համար` դրանք միացնելով համապատասխան համակարգերի։