Սեյրան Օհանյանը Հայաստանի սամբոյի ֆեդերացիայի կողմից պարգևատրվեց հատուկ գավաթով

Հայաստանի սամբոյի ֆեդերացիան, ՀՀ պաշտպանության նախարար Սեյրան Օհանյանի բարձր հովանու ներքո, Երևանում անցկացրեց ԽՍՀՄ կրկնակի հերոս, լեգենդար օդաչու Նելսոն Ստեփանյանի ծննդյան 100 ամյակին նվիրված սամբոյի միջազգային 4-րդ մրցաշարը:

Օգոստոսի 3-ին կայացավ մրցաշարի հանդիսավոր բացումը, որին ներկա էին վարչապետ Տիգրան Սարգսյանը, պաշտպանության նախարար Սեյրան Օհանյանը, բարձրաստիճան սպաներ և հյուրեր:

Պաշտպանության նախարարը ողջունեց մրցաշարի մասնակիցներին և հյուրերին, կարևորեց սպորտի և, մասնավորապես, սամբոյի նշանակությունը` հաղթանակներ ցանկացավ բոլոր մարզիկներին: Հայաստանի սամբոյի ֆեդերացիայի պատվավոր նախագահ, գրող և հրապարակախոս Զորի Բալայանը տեղեկացրեց, որ Նելսոն Ստեփանյանը եղել է նաև ճանաչված սամբիստ և թեթևատլետ, սպորտի վարպետ:
Միջազգային ասպարեզում հայրենիքի պատիվը բարձր պահած մարզիկերին պաշտպանության նախարար Սեյրան Օհանյանը պարգևատրեց «Նելսոն Ստեփանյան» մեդալներով:

Պաշտպանության նախարար Սեյրան Օհանյանն էլ Հայաստանի սամբոյի ֆեդերացիայի կողմից պարգևատրվեց հատուկ գավաթով:
Միջազգային 4-րդ մրցաշարի ընթացքում հաջող ելույթ ունեցան Հայաստանի մարզիկները: 60 կգ քաշային կարգում հաղթող դարձավ Վոլոդյա Սարգսյանը, ով եզրափակիչում հաղթեց Խաչատուր Սարգսյանին:

70 կգ քաշային կարգում Տիգրան Օհանյանը վճռական մրցամարտում զիջեց վրացի Գիգա Նոզաձեին, իսկ 81 կգ քաշային կարգում արցախցի Մարատ Գրիգորյանը զբաղեցրեց երկրորդ տեղը՝ զիջելով միայն վրաց մարզիկ Իրակլի Գոգիային:

56 կգ քաշային կարգում հաղթող դարձան արցախցի մարզիկ Էռնեստ Հայրապետյանը, իսկ 48 կգ քաշային կարգում՝ Դիանա Աղաջանյանը: