Կայացավ «Արի տուն» ծրագրի 6-րդ փուլի բացման արարողությունը

Օգոստոսի 5-ին կայացավ ՀՀ սփյուռքի նախարարության «Արի տուն» ծրագրի 6-րդ փուլի բացման հանդիսավոր արարողությունը, որին մասնակցում է 120 պատանի աշխարհի 15 երկրից:

Ողջունելով մասնակիցներին և հյուրընկալ ընտանիքներին՝ ՀՀ սփյուռքի նախարարի տեղակալ Վահե Ջիլավյանը նշեց, որ «Արի տուն» ծրագրի մասնակիցների թիվը տարեցտարի ավելանում է և սա է ծրագրի լավագույն գնահատականը: Ոգեշնչված և Հայրենիքով հիացած մասնակիցները դառնում են Հայաստանի ջահակիրներն իրենց բնակության երկրներում:

ՀՀ սփյուռքի նախարարության աշխատակազմի ղեկավար Ֆ. Զաքարյանը, մասնակիցներին փոխանցելով ՀՀ սփյուռքի նախարար Հրանուշ Հակոբյանի ողջույնի խոսքը, հույս հայտնեց, որ ծրագրի մասնակիցները երբեւէ կվերադառնան Հայաստան:

Համահայկական ծրագրերի վարչության պետ Ատոմ Մխիթարյանը, ավանդույթի համաձայն, մասնակիցներից ամենակրտսերին' Լիբանանից Ակասիա Մարիա Ազատյանին հագցրեց «Արի տուն» ծրագրի տարբերանշանով վերնաշապիկը և գլխարկը:

Շնորհակալական խոսքով հանդես եկավ Մոսկվայում ՀՀ դեսպանությանը կից հայկական կիրակնօրյա «Վերածնունդ» դպրոցի հայոց լեզվի ուսուցչուհի Իրինա Տարոնացին, ով Հայրենիք է բերել դպրոցի սաներից բաղկացած մի խումբ:

Գերմանիայից ժամանած Արփի Գույումճյանի մայրիկը՝ Անահիտ Հովսեփյանը, շնորհակալություն հայտնելով ՀՀ սփյուռքի նախարարությանը ջերմ ընդունելության և ծրագիրը լավ կազմակերպելու համար, առաջարկեց արիտունցիներին ևս մասնակից դարձել Հայրենիքում մաքրման, ծառապատման աշխատանքներին:

Մասնակիցներին ողջունեցին 2-րդ տարին անընդմեջ հյուրընկալ ընտանիքի ներկայացուցիչ Շենգավիթ համայնքից՝ Վիկտորիա Մարտիրոսյանը և 6-րդ փուլում 3 սփյուռքահայ պատանի հյուրընկալած Երևանի Խ.Աբովյանի անվան թիվ 2 դպրոցի տնօրեն Իռեն Հակոբյանը:

Միջոցառման ավարտին երաժշտական համարներով հանդես եկան Լիբանանից, Իտալիայից եւ Թբիլիսիից ժամանած մասնակիցները: