Իրան-Հայաստան՝ ջերմագին հարաբերություններ

Աշխատանքային այցով Իրանի Իսլամական Հանրապետություն ժամանած Սերժ Սարգսյանը երեկ ներկա է գտնվել Իրանի նորընտիր Նախագահ Հասան Ռոհանիի երդմնակալության արարողությանը, այնուհետև Թեհրանում հանդիպում է ունեցել վերջինիս հետ: Երկու երկրների նախագահները հանդիպմանը քննարկել են ինչպես երկկողմ, այնպես էլ բազմակողմ հարաբերություններին վերաբերող հարցերի լայն շրջանակ: Զրուցակիցներն ընդգծել են, որ հայ-իրանական համագործակցության օրակարգը բավականին հարուստ է և վկայում է մի շարք խոշոր նախագծերի իրականացման մասին: Զրուցակիցներն անդրադարձել են նաև տարածաշրջանային խնդիրներին, մասնավորապես` Լեռնային Ղարաբաղի հակամարտության բանակցային գործընթացի ներկա վիճակին:

Իրան-Հայաստան ջերմ հարաբերությունների մասին Lurer.com-ի թղթակիցը զրուցեց քաղաքագետ Հրանտ Մելիք-Շահնազարյանի հետ.

«Հայաստանը կարողացել է դժվարին իրավիճակներում պահպանել բարիդրացիական հարաբերությունները Իրանի հետ և հնարավորինս
զարգացնել դրանք: Եվ այժմ, երբ որ Իրանում նախագահ է դարձել այնպիսի մի անձնավորություն, ով պատրաստ է բանակցությունների արդյունքում ավելի կարգավորել հարաբերությունները Արևմուտքի, ինչպես նաև Ռուսաստանի հետ, ես կարծում եմ, որ սա լավ հնարավորություն է տալիս Հայաստանին հանդես գալ և խթանել այդ հարաբերությունների կարգավորումը` իհարկե զուգահեռաբար նպաստելով հայ-իրանական քաղաքական-տնտեսական հարաբերությունների զարգացմանը»,- իր տեսակետը հայտնեց քաղաքագետը: 

Վերջինս կարծում է, որ Սերժ Սարգսյանի այցը Իրան և բարձր մակարդակով Իրանի նախագահի երդմնակալությանը մասնակցությունը,
իհարկե, վկայում է նախևառաջ երկու երկրների պատրաստակամության մասին. հետագայում այդ հարաբերությունները կլինեն ի նպաստ Իրանի և Հայաստանի:

Նշենք նաև, որ հանդիպման ընթացքում Սերժ Սարգսյանը և Հասան Ռոհանին պատրաստակամություն հայտնեցին նույն ոգով աշխատել հայ-իրանական համագործակցության խորացման ուղղությամբ: