Գանձասարի առյուծի հեղինակին «քցել» են

«Հրապարակ-ը ուշագրավ մանրամասներ է ներկայացնում Գանձասարում գտնվող քարակերտ առյուծի ստեղծման մասին: Գանձասարի ժայռակերտ առյուծը հայտնի է այստեղ եկող բոլոր զբոսաշրջիկներին, որոնք սիրում են լսել նրա մռնչոցը, որն անհասկանալի կերպով դուրս է գալիս ժայռերի միջից, եւ լուսանկարվել նրա մոտ, թաթերի ստորոտում: Բայց քչերը գիտեն, որ այս քանդակի հեղինակը նկարիչ Արամ Ավագյանն է, որն ապրում է Ստեփանակերտում եւ մեծահարուստների պատվերներով քարակերտ արձաններ է կերտում:

«Այդ պահին իմ մեքենան խարաբ էր: Մենք տղաներով բրթում էինք իմ մեքենան: Լեւոն Գուրգենիչը որ տեսավ, ասեց՝ եթե շինես առյուծը, քո ասածն անես, մի հատ ավտո կնվիրեմ: Ասեց՝ ի՞նչ մեքենա ես ուզում: Ասեցի՝ «Պրադո»»: Իհարկե, Գանձասարի առյուծն ավելին արժեր, քան «Պրադոն», բայց նկարիչն ամաչել է առեւտրի մեջ մտնել հայտնի բարերարի հետ: «3 տարի աշխատել եմ՝ գիշեր-ցերեկ, ձմեռ-ամառ: Վերջում էլ դուրս եկավ, որ ինքը պատրվակ գտավ, ինձ հետ կոնֆլիկտի մեջ մտավ ու ինձ չվճարեց»:

Բացի ժայռաքանդակը, Արամ Ավագյանը նաեւ ձիաբուծարանի կառուցմամբ, Գանձասարի կանաչապատմամբ է զբաղվել, շենքերի ֆասադների դիզայնով: Սկզբնական շրջանում Լեւոն Հայրապետյանը վստահել է իր դիզայներին, նույնիսկ տնօրեն է նրան նշանակել: Շինարարական աշխատանքների ժամանակ, ինչպես հաճախ է պատահում բարեգործների տրամադրած միջոցների հետ, որոշ նյութեր անհետացել են: Լեւոն Հայրապետյանին ահազանգ է եղել, թե նկարիչը «սալյարկան» աննպատակ ծախսել է: «Զանգել էին իրեն Ռուսաստան, ստեր էին ասել, որ ես, իբր, 60 տոննա սալյարկա եմ ծախսել աննպատակ: Նա էլ, առանց «ռազբորկա» անելու, միանգամից հավատացել էր եւ հեռացրեց ինձ տնօրենի պաշտոնից»:

Հիմա, ժամանակ անց, Արամը հասկանում է, որ սա ուղղակի առիթ էր, որ իրեն չվճարեին իր քրտնաջան աշխատանքի դիմաց:

Մանրամասները` «Հրապարակ»-ի այսօրվա համարում: