Մանուկ Մկրտչյանի դոկտորականը հաստատվեց

Բարձրագույն որակավորման հանձնաժողովի նախագահի պաշտոնակատար Լիլիթ Արզումանյանը ԺՊ նշանակվելու հաջորդ իսկ օրը հաստատել է ԿԳ նախարար Արմեն Աշոտյանի տեղակալ, Ֆլեշի Բարսեղի հովանավորյալ Մանուկ Մկրտչյանի դոկտորականը: Հիշեցնենք, որ Մ. Մկրտչյանը դեռ անցած տարվա հոկտեմբերի 26-ին «Ուսուցման կազմակերպման կոլեկտիվ եղանակի իրականացման մեթոդաբանությունը, տեսությունը եւ պրակտիկան» թեմայով դոկտորական դիսերտացիա էր փորձել պաշտպանել, սակայն Արտյուշա Ղուկասյանը՝ ԲՈՀ-ի նախկին նախագահը, չէր հաստատում այն: Հենց այս դոկտորականը չհաստատելն էլ ճակատագրական դարձավ Ղուկասյանի համար:

Մկրտչյանի դոկտորականի հիմքում այն մանկավարժական մեթոդն է, ըստ որի, ուսուցիչն այլեւս դպրոցում չպետք է դաս բացատրի, երեխաները պետք է իրար օգնեն ուսուցման պրոցեսում: Այս դիսերտացիան բուռն դժգոհությունների տեղիք էր տվել մանկավարժական հանրության շրջանում, եւ պաշտպանությունը կասեցվել էր: Ղուկասյանի պաշտոնանկությունից հետո ԲՈՀ-ի նախագահի պաշտոնակատարի հապճեպ որոշումը հաստատեց, որ Ղուկասյանի ազատման հետ կապված խոսակցությունները հիմնավոր են: Արզումանյանն այս օրերին մեկնել է Բարսելոնա՝ «վաստակած» հանգստի, եւ նրա հետ խոսել չհաջողվեց:

Ասում են՝ ԲՈՀ-ի նախագահի նշանակման հարցը կլուծվի աշնանը, սակայն լավատեղյակ աղբյուրներն ասում են, որ անգամ դիսերտացիայի հաստատումը չի նպաստելու Արզումանյանի՝ ԲՈՀ-ի նախագահ նշանակվելուն: Սակայն ամենահետաքրքիրը եղել է ԲՈՀ նախագահի պաշտոնակատարին ներկայացնելու պրոցեսը: ԿԳ փոխնախարար Մանուկ Մկրտչյանն այնքան անամոթություն է ունեցել, որ ինքն է գնացել ԲՈՀ ԺՊ Լիլիթ Արզումանյանին ներկայացնելու: Նախ, փորձել է ԲՈՀ-ի անձնակազմին պատմել, թե ով է Լիլիթ Արզումանյանը, ով համեստաբար ընդհատել է եւ նկատել, որ այս կոլեկտիվի հետ աշխատել է շուրջ 20 տարի, եւ բոլորն իրեն ճանաչում են՝ ներկայացնելու կարիք չկա: Պաշտոնական մասը հորով-մորով անելուց հետո Մանուկ Մկրտչյանն անցել է գեղարվեստական մասին: Իր հիացմունքն է հայտնել եւ զարմանքը, թե ինչու մինչ օրս չէր եղել ԲՈՀ-ում: Ասել է, որ թերեւս պատճառն այն է, որ իրեն թթի օղի չեն հյուրասիրել՝ ինքը թթի օղի շատ է սիրում եւ հաջորդ անգամ բերելու է, որ միասին խմեն:

Ապա, փորձելով հասկացնել, որ ինքն արժանի է դոկտորական աստիճանին, եւ իզուր ԲՈՀ-ի նախագահը չի հաստատել իր դիսերտացիան, հայտարարել է՝ հիմա խոսելու ենք հայի տեսակից եւ մասնավորապես Հայկ ու Բելից: Երբ սկսել է դասագրքային առասպելը հենց դասագրքային գիտելիքների մակարդակով ներկայացնել ԲՈՀ-ի անձնակազմին, մարդիկ զարմանքից կարկամել են եւ ավելի համոզվել, որ Արտյուշա Ղուկասյանը ճիշտ էր, որ չէր հաստատում սրա դիսերտացիան: Բայց ամենահետաքրքիրը եղել է փոխնախարարի հայտարարությունը, թե ինքը շատ է հավանում ֆաշիզմը, քանի որ ֆաշիստական ամենահայտնի մեթոդը «բարդ հարցերը պարզ եղանակով լուծելն էր»: Ունկնդիրները սա ուղղակի սպառնալիք են դիտել եւ մտածել են, որ շուտով ԲՈՀ-ի հարցերն էլ է փոխնախարարը «ֆաշիստական մեթոդով լուծելու»: Այնպես, ինչպես Արտյուշա Ղուկասյանի հարցերը լուծեց:

Մանրամասները` «Հրապարակ»-ի այսօրվա համարում: