Ո՞ր ընկերությունը կզբաղվի գյուղատնտեսության ապահովագրության ծրագրերով

ՀՀ գյուղատնտեսության նախարար Սերգո Կարապետյանն այսօր գյուղատնտեսության ապահովագրության ծրագրերի շուրջ բանակցել է «Ինգոստրախ» ԲԲԸ-ի Գյուղատնտեսական ապահովագրության վարչության պետ Դելյարա Սանգաջիևայի, «Էկսար» ընկերության հատուկ նախագծերի դեպարտամենտի ղեկավար Ալեքսեյ Բեզձենեժնիխի և «ԻՆԳՈ ԱՐՄԵՆԻԱ» ՓԲԸ գործադիր տնօրեն Լևոն Ալթունյանի և հատուկ նախագծերի բաժնի ղեկավար Արտակ Մարտիրոսյանի հետ՝ վերջիններիս խնդրանքով:

Հյուրերը նախ շնորհակալություն են հայտնել նախարարին և տեղեկացրել, որ գյուղատնտեսական ապահովագրության առումով իրենց աշխարհագրությունը ձգվում է Կալինինգրադից մինչև Կամչատկա: Քանի որ 2013 թվականի կառավարության ծրագրով նշված է, որ Հայաստանում ստեղծվելու են նախադրյալներ գյուղատնտեսության ոլորտում ապահովագրական համակարգի աստիճանական ներդրման համար, նախարարն առաջարկել է ստեղծել աշխատանքային խումբ, որն կմշակի առաջիկա 5 տարիների աշխատանքային ուղեցույցներ՝ այն գնահատելով որպես երկարատև պրոցես:

Նախարարը հյուրերին մասնավորապես առաջարկել է ներկայացնել համապատասխան նախագծեր և որպես մեկնարկ սկսել կոնկրետ ոլորտից՝ նախանշելով գյուղտեխնիկայի և անասնապահության ապահովագրությունը: Բանակցող կողմերը, կարևորելով գյուղատնտեսության ապահովագրությունը, այն համարել են գյուղատնտեսության հետագա զարգացման համար անհրաժեշտ նախապայման և երկարաժամկետ ու հուսալի պաշտպանություն բնական աղետներից և այլ ֆորսմաժորային իրավիճակներից: Գյուղատնտեսության նախարարն առանձնահատուկ շեշտել է, որ ապահովագրության ներդրումը զբաղվածության ապահովման, միգրացիայի կանխարգելման, ինչպես նաև աղքատության կրճատման առումով եզակի գործիք է, ինչն իրեն հաստատել է աշխարհի զարգացած տնտեսություններում:

ԳՆ հասարակայնության հետ կապերի բաժին