Գրիգոր Միրզա-Ավագյան. շատ է աշխուժացել քաղաքը

Երևանի քաղաքապետ Տարոն Մարգարյանը հյուրընկալել է ամերիկաբնակ Գրիգոր Միրզա-Ավագյանին, ով հայաստանյան «Լույս» հիմնադրամի շնորհիվ ԱՄՆ-ի Կոլումբիայի համալսարանում ստացել է մագիստրոսական կոչում՝ քաղաքային տնտեսության մենեջմենթ մասնագիտությամբ։ Ողջունելով հյուրին՝ քաղաքապետը նշել է, որ հեռուստատեսությամբ հեռարձակված տեսանյութից է տեղեկացել, որ քաղաքային տնտեսության կառավարման ոլորտում մասնագիտացած երիտասարդ մասնագետը պատրաստակամ է հաստատվելու Երևանում և իր գիտելիքներն ու փորձը ներդնելու մայրաքաղաքի զարգացման գործում։

«Մեր ցանկությունն է, որ թե՛ հայաստանաբնակ, թե՛ արտերկրում բնակվող մեր հայրենակից լավագույն մասնագետներին ներգրավենք Երևանի զարգացման գործում։ Ողջունում եմ հայրենիքում մնալու Ձեր ցանկությունն ու ստացած գիտելիքներն այստեղ իրացնելու պատրաստակամությունը»,-նշել Տարոն Մարգարյանը։
Շնորհակալություն հայտնելով ջերմ ընդունելության համար՝ Գրիգոր Միրզա-Ավագյանը նախ խոստովանել է, որ իր համար իսկապես հաճելի անակնկալ է եղել քաղաքապետի հրավերը, ու առավել ևս տպավորված է, որ Տարոն Մարգարյանի ուշադրությունից չի վրիպել իր մասին պատմող տեսանյութը։ Նա նաև ընգծել է, որ սա իր հերթին խոսում է քաղաքի զարգացմամբ իսկապես մտահոգ քաղաքապետ լինելու մասին։
Մայրաքաղաքում անցկացրած այս օրերի՝ իր տպավորությունների մասին խոսելով Գրիգորը նախ նշել է, որ ակնառու են մայրաքաղաքի դրական փոփոխությունները, բայցև, որպես մասնագետ նկատել է, որ, անշուշտ, դեռևս որոշակի անելիքներ կան։

«Շատ է աշխուժացել քաղաքը։ Շատ երկար ժամանակ չեմ եղել Երևանում և հիմա ավելի պրոֆեսիոնալ աչքով եմ նայում, նկատում ձեռքբերումներն ու թերությունները։ Օրինակ՝ նստարանները շատ հաջող մտահղացում են։ Քաղաքի մաքրությունն էլ բավականին լավ վիճակում է, ասֆալտապատումը ևս, սակայն, օրինակ, երթևեկը կանոնակարգման կարիք ունի։ Քաղաքն, անշուշտ, մեծ ներուժ ունի, և շատ հարցերում անհրաժեշտ է նաև երևանցիների աջակցությունը»,– զրույցում նշել է Գրիգոր Միրզա-Ավագյանը։
Քննարկելով Գրիգորի մասնագիտական դիտարկումները ոլորտի վերաբերյալ՝ Տարոն Մարգարյանն առաջարկել է հյուրին ծանոթանալ քաղաքապետարանում ոլորտի համակարգման աշխատանքներին, հետագայում նաև քննարկել աշխատակազմում ներգրավվելու առաջարկը։