Սփյուռքի նախարարի տեղակալ Վահե Ջիլավյանը մասնակցեց Հայագիտական համահայկական վեցերորդ օլիմպիադայի բացմանը

Օգոստոսի 9-ին ՀՀ սփյուռքի նախարարի տեղակալ Վահե Ջիլավյանը մասնակցեց «Առնո Բաբաջանյան» համերգասրահում մեկնարկած Հայագիտական համահայկական վեցերորդ օլիմպիադայի բացմանը, որին մասնակցում են 14 տարին լրացած և ավելի բարձր տարիքի ավելի քան 120 դպրոցական և շուրջ 30 ուղեկցող:

Երկամյա պարբերականությամբ Հայաստանում կազմակերպվող Օլիմպիադայի նպատակն է խրախուսել հայոց լեզվի, գրականության, պատմության և մշակույթի իմացությունն արտերկրում բնակվող հայ երեխաների շրջանում, օգնել նրանց ճանաչել Հայաստանը և ամուր կապվել Հայրենիքին:

Բացելով միջոցառումը՝ ՀՀ ԿԳ նախարարի տեղակալ Մանուկ Մկրտչյանը խոսքը փոխանցեց ՀՀ վարչապետի խորհրդական Արամ Անանյանին, ով ընթերցեց ՀՀ վարչապետ Տիգրան Սարգսյանի՝ մասնակիցներին ուղղված խոսքը:

Ողջունելով օլիմպիադայի մասնակիցներին՝ ՀՀ սփյուռքի նախարարի տեղակալ Վ. Ջիլավյանը մասնավորապես նշեց. «ՀՀ կառավարությունը հատուկ ուշադրություն է դարձնում Սփյուռքում հայապահպանությանը: Օլիմպիադայի մասնակիցները, զինվելով հայոց լեզվի, պատմության, գրականության և հայ եկեղեցու պատմության մասին գիտելիքներով, ժամանել են Հայրենիք: Այստեղ նրանք ոչ միայն կամրապնդեն իրենց գիտելիքները, կմրցեն միմյանց հետ, հնարավորություն կունենան այցելել Հայաստանի տեսարժան վայրեր, ավելի ամուր կկապվեն իրենց արմատներին»:

Պարոն Ջիլավյանը բարձր գնահատեց նաև, որ 2013 թվականից առանձին անվանակարգով ավելացել է «Հայ եկեղեցու պատմություն» առարկան: ՀՀ սփյուռքի նախարարության կողմից գրականության համահայկական օլիմպիադայի և հայագիտական գիտելիքների մրցույթի համար 2009 թվականից սահմանվել է երեք անվանակարգ՝ ասմունք, ճարտասան և հայրենասիրական երգ և որպես մրցանակներ մասնակիցներին հանձնվում են «Ցավի, հիշողության և պայքարի կոթողներ» պատկերագրքեր և խտասկավառակներ: