Այսօր Ռոլանդ Շառոյանի ծննդյան օրն է

Արձակագիր, լրագրող Ռոլանդ Շառոյանը ծնվել է 1952թ. օգոստոսի 11-ին, Աշնակ գյուղում: 1974-ին ավարտել է ԵՊՀ բանասիրական ֆակուլտետի ժուռնալիստիկայի ֆակուլտետը։

1974-75-ին աշխատել է ՀԽՍՀ Նախարարների խորհրդի հեռուստատեսության և ռադիոհաղորդումների պետական կոմիտեի երիտասարդական հաղորդումների խմբագրությունում որպես խմբագիր, 1976-77-ին` հեռուստատեսային ֆիլմերի «Երևան» ստուդիայում որպես ֆիլմի տնօրեն։ 1977-ից աշխատել է «Ծիծեռնակ» ամսագրի խմբագրությունում, որպես արձակի բաժնի վարիչ։

1998-2003-ին եղել է ՀՀ Մշակույթի, երիտասարդության հարցերի և սպորտի նախարար։ Ֆիզիկական կուլտուրայի հայկական պետական ինստիտուտի մարզական լրագրության և շախմատի ամբիոնի վարիչն է։ Հիմնադրել և խմբագրել է «Մարզաշխարհ», «Նավասարդ» և «Էրգիր» թերթերը։ 

Պատմվածքների, վիպակների թեման գյուղն է` իր հոգսերով, առօրյայով, որոնցից են` «Հարյուր կռունկ» (1979թ.), «Մառախուղ», (1985թ.), «Շոգիլք» (2001թ.), «Ամպշող արև» (2001թ.) ժողովածուներ: Գրել է նաև մանուկների համար` «Իշուկ-գորշուկը, որ գնում էր աշխարհ տեսնելու», «Խաղաղ կեսօր», պատմվածքների և հեքիաթների ժողովածուներ, «Իմ անունը Գևորգ է, ձիուս անունը՝ Կայծակ» հեքիաթներ: Նրա սցենարով նկարահանվել է «Կորսված դրախտ» գեղարվեստական կինոնկարը (1989թ.), Երևանի Սունդուկյանի անվան թատրոնում բեմադրվել է «Մեր բաժին ուրախությունը» (2003թ.) դրաման:

Նրա ստեղծագործությունները թարգմանվել են ռուսերեն, գերմաներեն, հունգարերեն, ուկրաիներեն, սլովակերեն, չեխերեն, տաջիկերեն և վրացերեն։