ՎիվաՍել-ՄՏՍ-ը անդրադարձել է ֆեյսբուքյան մի օգտատիրոջ գրառմանը

ՎիվաՍել-ՄՏՍ-ը անդրադարձ է կատարել Վրաստանում ռոումինգի վերաբերյալ ֆեյսբուքյան իր էջում բաժանորդ Դավիթ Տաշչյանի կատարած գրառմանը.

Հարգելի Դավիթ Տաշչյան,

ՎիվաՍել-ՄՏՍ-ը ցանկանում է հստակեցում մտցնել Վրաստանում ընկերության ռոումինգ ծառայությունների վերաբերյալ` ֆեյսբուքյան Ձեր էջում հրապարակային/բաց հայտարարության առնչությամբ:

Հաշվի առնելով յուրաքանչյուր բաժանորդի հանդեպ ընկերության պատասխանատու վերաբերմունքը, առաջարկում ենք և պատրաստ ենք հնարավորին սեղմ ժամկետում Ձեզ ներկայացնել մեր պարզաբանումները և անհրաժեշտ աջակցությունը: Դրա համար, սակայն, անհրաժեշտ են Ձեր կոնտակտային տվյալները: Ցավոք, մեզ անհայտ պատճառներով, Դուք դեռևս չեք արձագանքել Ֆեյսբուքում Ձեզ ուղղված անհատական հաղորդագրությանը:

Հաշվի առնելով, որ հարցը Ձեր կողմից բարձրացվել է հրապարակավ և վերաբերում է ընկերության և նրա կողմից մատուցվող ծառայությունների բարի համբավին, ինչպես նաև այն, որ Ձեր մեկնաբանությունը հիմք է ընդունվել մի շարք լրատվամիջոցների կողմից, մենք ևս դիմում ենք Ձեզ բաց և հրապարակային' խնդրելով կապ հաստատել մեզ հետ և հայտնել բջջային այն հեռախոսահամարը որից, ինչպես նշել եք, ռոումինգում գտնվելիս զանգեր եք կատարել դեպի Հայաստան: Դա հնարավորություն կտա հստակեցնելու իրավիճակը (հաշվի առնելով տվյալների գաղտնիությունը' դրանք մեզ տրամադրելու տարբերակների ընտրությունը թողնում ենք Ձեզ):

Ֆեյսբուքի հարգարժան օգտատերեր և լրատվամիջոցների ներկայացուցիչներ,

ՎիվաՍել-ՄՏՍ ընկերությունը Դավիթի ֆեյսբուքյան ընկերներին հորդորում է աջակցել' նրա հետ կապ հաստատելու հարցում:

ՎիվաՍել-ՄՏՍ-ն ունի ավելի քան 400 ռոումինգ գործընկեր՝ աշխարհի գրեթե բոլոր երկրներում: Ծառայությունը մատուցվում է արդեն ութ տարի: ՎիվաՍել-ՄՏՍ-ը մշտապես հստակ և ամբողջական տեղեկություններ է տրամադրում բոլոր ռոումինգ ծառայությունների վերաբերյալ, այդ թվում՝ աշխարհագրական տարբեր գոտիներում գործող սակագների, ինչպես նաև ռոումինգ ծառայությունների օգտագործման պայմանների վերաբերյալ:

Ինչ վերաբերում է Վրաստանում ռոումինգ ծառայությանը' ելքային զանգերի սակագինը մեկ րոպեի համար կազմում է 880 դրամ, իսկ մուտքային զանգերի սակագինը՝ 80 դրամ (ինչը պայմանավորվում է վրաստանյան օպերատորների հետ միակցման արժեքով): Հաշվի առնելով, որ ամառային շրջանում ՎիվաՍել-ՄՏՍ-ի բաժանորդների կողմից տարբեր ուղղություններով ռոումինգ ծառայությունների սպառման ծավալն աճում է, ՎիվաՍել-ՄՏՍ-ը մշակել է հատուկ՝ «Զանգ Հայաստան» ծառայությունը, որը թույլ է տալիս Հայաստան զանգահարել առավել մատչելի՝ 55 դրամ մեկ րոպեի համար սակագնով:

Հարկ ենք համարում հիշեցնել, որ «Զանգ Հայաստան» ծառայությունը շուկայում ներկայացնելուց ի վեր, ՎիվաՍել-ՄՏՍ-ը պատշաճ կերպով տեղեկացնում է ծառայության, սակագների, ինչպես նաև դրանից օգտվելու մասին, հաղորդակցման բոլոր հնարավոր ուղիներով, այդ թվում՝ հեռուստատեսությամբ, առցանց լրատվամիջոցներով, տպագիր մամուլի միջոցով, ընկերության ֆեյսբուքյան պաշտոնական էջով, ընկերության պաշտոնական կայքէջով, լրտավամիջոցներին ուղարկվող մամլո հաղորդագրությունների միջոցով, ինչպես նաև հայ-վրացական սահմանը հատելիս' ռոումինգ ծառայությունն ակտիվացրած բոլոր բաժանորդներին ուղարկվող SMS հաղորդագրությունների միջոցով:

Այսպիսով, ինչպես տարածվել և տարածվում է հաղորդակցության վերը նշված ուղիներով, «Զանգ Հայաստան» ծառայությունից օգտվելու համար անհրաժեշտ է նախքան Հայաստանից մեկնելն ակտիվացնել ռոումինգը, իսկ արդեն արտասահմանում գտնվելիս հավաքել նիշերի հետևյալ համակցությունը. *101*հեռախոսահամարը#: Այս հրահանգի միջոցով ՝ հնարավոր է Հայաստան զանգահարել մեկ րոպեն 55 դրամ սակագնով: Ծառայությունից օգտվում է ՎիվաՍել-ՄՏՍ-ի՝ արտասահմանում գտնվող բաժանորդների գերակշռող մասը, այդ թվում նրանք, ովքեր գտնվում են Վրաստանում: Բաժանորդներն իրենց գոհունակությունն են հայտնում թե՛ սակագնի, և թե՛ ծառայության որակի վերաբերյալ:

Ավելին, Ձեր գրառման տակ, անգամ, մեկնաբանություններ թողած՝ Ֆեյսբուքի օգտատերերի արձագանքից և «Զանգ Հայաստան» ծառայությունից օգտվելու հնարավորության մասին հուշումներից ակնհայտ է դառնում, որ ծառայությունը մեծ ժողովրդականություն է վայելում:

ՎիվաՍել-ՄՏՍ-ը հաճախորդամետ և սոցիալապես պատասխանատու ընկերություն է: Անձնագիր և անհրաժեշտ տեղեկություններ ներկայացնելով, ցանկացած բաժանորդ կարող է ստանալ մանրամասն հաշիվ՝ անմիջապես ստանալով նաև պատշաճ սպասարկում: Մեր զանգերի կենտրոնը գործում է շուրջօրյա և բաժանորդը կարող է ստանալ ամբողջական աջակցություն ընդամենը մեկ զանգի միջոցով՝ զանգահարելով 111՝ Հայաստանից կամ արտասահմանյան ցանկացած երկրից, որտեղ գործում է ՎիվաՍել-ՄՏՍ-ի ռոումինգ ծառայությունը (ծառայությունը վճարովի է այն դեպքերում, երբ զանգը կատարվում է ՄՏՍ խմբի մաս չհանդիսացող օպերատորի ցանցից): ՎիվաՍել-ՄՏՍ-ի օպերատորներին կարելի դիմել նաև [email protected] հասցեով կամ Ֆեյսբուքում ընկերության պաշտոնական էջի միջոցով:

Շնորհակալություն: