«Բազե 2013»-ը բացված է (ֆոտո)

Երևանի քաղաքապետ Տարոն Մարգարյանը Ծաղկաձորում մասնակցել է «Բազե 2013» համահայկական երիտասարդական հավաքի հանդիսավոր բացմանը: ՀՀ վարչապետ Տիգրան Սարգսյանի, կրթության և գիտության նախարար Արմեն Աշոտյանի և պաշտոնատար այլ անձանց հետ միասին քաղաքապետը նախ ներկա է գտնվել հավաքի մեկնարկն ազդարարող պաշտոնական արարողությանը:

Ամենամյա ավանդական դարձած հավաքին այս տարի մասնակցում են 18-ից 30 տարեկան ավելի քան 500 երիտասարդներ' Հայաստանից, Արցախից, Ջավախքից և սփյուռքից: Ի դեպ, մասնակիցների թիվն այս տարի 150 երիտասարդով ավելի է նախորդ տարվա համեմատ:
Օգոստոսի 12-ից 18-ը անցկացվող համահայկական երիտասարդական հավաքի շրջանակում նախատեսված են մարզամշակութային մի շարք միջոցառումներ: Աշխարհի տարբեր անկյուններից մեկ գաղափարի շուրջ միավորված երիտասարդները նաև մրցելու են մի շարք մարզաձևերում:

Եռագույնի ներքո «Բազե 2013» հավաքին ձևավորված 45 ջոկատներից երկուսը Երևանից են և համախմբված են նարնջագույն և կապույտ ճակատներում: Ջոկատավարները քաղաքապետին խոստացել են, որ պայքարելու են միայն հաղթանակի համար' բարձր պահելով Երևանի պատիվը:

7-օրյա ծրագրում նախատեսված են նաև հանդիպումներ պետական, քաղաքական, հասարակական դաշտի գործիչների հետ: Բացման հանդիսավոր արարողությունից հետո քաղաքապետ Տարոն Մարգարյանը ներկա է գտնվել նաև բազեականների հետ անցկացվող հարցուպատասխանին: