ՀՀԿ ԳՄ նիստում որոշվեց թիվ 38 ընտրատարածքում ՀՀԿ թեկնածուի ինքնությունը

Այսօր ՀՀԿ ԳՄ նիստում քննարկվել է Սյունիքի մարզի թիվ 38 ընտրատարածքում թեկնածություն առաջադրելու հարցը:

ՀՀԿ մամուլի խոսնակ Էդուարդ Շարմազանովը լրագրողների հետ ճեպազրույցում ասաց, որ ՀՀԿ ԳՄ նիստում միաձայն որոշել են առաջադրել

Կապանի նախկին քաղաքապետ Արմեն Կարապետյանի թեկնածությունը։ 

Կուսակցությունն ընդունել է Սյունիքի մարզային կառույցի առաջարկը:

Այն մասին, որ թեև Սյունիքի մարզպետը Վահե Հակոբյանն է, բայց մարզում ազդեցությունը Սուրեն Խաչատրյանինն է, Շարմազանովն ասաց. «Ազդեցությունը ոչ իրավական, ոչ էլ քաղաքական կատեգորիա չէ: Մարզպետը Վահե Հակոբյանն է, և կարող է պատվով իրականացնել իր վրա դրված պարտականությունները»:

Հիշեցնենք, որ 2013 թ. հունիսի 1-ին՝ ժամը 23:00-ի սահմաններում, Գորիս քաղաքում Սյունիքի մարզպետ Ս. Խաչատրյանին պատկանող առանձնատան դիմաց տեղի ունեցած կրակոցների հետևանքով Գորիսի քաղաքապետի նախկին թեկնածու Ավետիք Բուդաղյանը մահացել է, իսկ նրա եղբայր գնդապետ Արտակ Բուդաղյանը և Ս. Խաչատրյանի թիկնապահներից Նիկոլայ Աբրահամյանը ստացել են հրազենային վնասվածքներ։

Միջադեպից հետո Սուրեն Խաչատրյանը հանդես եկավ հայտարարությամբ, որում հայտնում էր մարզպետի իր լիազորությունները դադարեցնելու մասին, ինչից հետո, կառավարության որոշմամբ, Սյունիքի մարզպետ նշանակվեց Զանգեզուրի պղնձամոլիբդենային կոմբինատի տնօրեն Մաքսիմ Հակոբյանի որդին՝ Վահե Հակոբյանը։

Վերջինս 2012 թվականի մայիսի 6-ին կայացած խորհրդարանական ընտրություններին մեծամասնական ընտրակարգով պատգամավոր էր ընտրվել թիվ 38 ընտրատարածքից։