Այսօր Վահագն Դավթյանի ծննդյան օրն է

Եվ այնպես հաճախ,
Երբ արթնանում ես առավոտ կանուխ,
Որ հերկերիդ մեջ ցորյանը ցանես քո խոսք ու հանգի,
Ինչ-որ դարանից դավի ու ստի նետը սլանում
Ու մխրճվում է թրթռոցի մեջ քո ներշնչանքի:
Դու' հավատացյալ,-
Խոստովանանքիդ սուրբ ժամն էր պղծել,
Դու' լույս ճամփորդ,-
Քո շողքն են առել սմբակների տակ,
Զառամ շուրթերով անունդ են ծամում խեղկատակ մի ծեր,
Ինչ-որ գեր առնետ,
Արնոտ աչքերով ինչ-որ ստահակ...

Վահագն Դավթյան

Վահագն Դավթյանը ծնվել է 1922 թ. օգոստոս 15-ին, Արևմտյան Հայաստանի Արաբկիր գյուղաքաղաքում: Չորս տարեկան էր, երբ Տրապիզոնից նավով գաղթում և ժամանակավորապես հաստատվում են Կրասնոդար քաղաքում: Այնտեղից էլ արաբկիրցիները 30-ականներին եկել և Երևանում հիմնել են նոր Արաբկիրը: 1932 թվականից Դավթյանների ընտանիքը ևս հաստատվում է Երևանում` Արաբկիր թաղամասում։
Վահագն Դավթյանը եղել է Հայաստանի մշակույթի վաստակավոր գործիչ (1970), թերթի խմբագիր։

Տպագրվել սկսել է 1935 թվականից։ «Առաջին սեր» (1947), «Աշխարհի առավոտը» (1950) բանաստեղծությունների հավաքածուներում արտահայտված են Մեծ Հայրենական Պատերազմի մասնակցի հայրենասիրական զգացմունքները, սերը հարազատ հողի, բնության նկատմամբ։
«Ճանապարհ սրտի միջով» (1952) պոեմը նվիրված է Սովետական Միության Հերոս Ու. Ավետիսյանի հիշատակին։ «Լուսաբացը լեռներում» (1957), «Ամառային ամպրոպ» (1964), «Գինու երգը» (1966) և այլ բանաստեղծություններում հեղինակը խորը ներթափանցում է ժամանակակցի բարոյական աշխարհը։ Քաղաքացիությամբ և քնարերգությամբ է ողողված «Թոնդրիկցիներ» պատմական վեպը, որը գրվել է 1961 թվականին, նվիրված է միջնադարյան Հայաստանի պատմական իրադարձություններին։ 1969 թվականին տպագրեց «Ծուխ ծխանի» պատմական վեպերի գիրքը։

Թարգմանել է Ա. Ս. Պուշկինի, Ս. Ա. Եսենինի, Շ. Պետեֆիի, Ա. Բլոկի, Ա. Կիրակոսյանի բանաստեղծություններից և վեպերից։

Վ. Դավթյանի ստեղծագործության հիմնական թեմաներն են հայրենիքը, մարդը, նրա աշխատանքն ու հույզերը։

Գրել է քնարական բանաստեղծություն, բալլադ, ասք, պոեմ։ Դավթյանի երկերում ընդգծվում են սերը, հողի և աշխատանքի պոեզիան, բնությունը, պատմության առավել դրամատիկ դրվագները, ասքերը։ Գրել է ակնարկներ հրապարախոսական, գրականագիտական հոդվածներ, հուշագրային նոթեր ևս։

Վախճանվել է 1996 թվականին։