Այսօր աշխարհահռչակ պոլսահայ լուսանկարիչ Արա Գյուլերի ծննդյան օրն է (տեսանյութ)

Պոլսահայ լուսանկարիչ, լրագրող Արա Գյուլերը ծնվել է 1928 թ. օգոստոսի 16-ին, Ստամբուլում: Դպրոցական տարիներին աշխատել է Թուրքիայի կինոստուդիաներում և հաճախել թատերական դասընթացների: 1950 թվականից սկսել է աշխատել «Նոր Ստամբուլ» թերթում` զուգահեռ ուսանելով Ստամբուլի համալսարանի տնտեսագիտական ֆակուլտետում: Որոշ ժամանակ անց տեղափոխվել է «Հյուրիեթ» թերթի խմբագրություն: 1958 թ. դարձել է ամերկյան «Լայֆ Թայմ» հանդեսի թուրքական մասնաճյուղի Մերձավոր Արևելքի առաջին թղթակիցը, ինչպես նաև գործակցել միջազգային մի քանի հեղինակավոր լրատվամիջոցների հետ` ֆրանսիական «Փարիզ Մատչ», գերմանական «Սթերն» և բրիտանական «Սանդի Թայմս»: 1961 թ. ավարտելով զինվորական ծառայությունը` աշխատանքի է անցել «Հայաթ» թերթում` գլխավորելով լուսանկարչական բաժինը: 1960-ականներից նրա լուսանկարները զարդարել են անվանի գրողների գրքեր և ցուցադրվել աշխարհի տարբեր ցուցահանդեսներում:

800 հազար լուսանկարների հեղինակ է Արա Գյուլերը, եղել է «Ենի Իստամբուլ», «Թայմ լայֆ», «Փարիզ մատչ», «Ստեռն», թերթերի, «Մագնում» գործակալության ֆոտոլրագրող, «Հայաթ» ամսագրի լուսանկարչական բաժնի ղեկավար: Միացյալ Թագավորությունում հրատարակված «Լուսանկարչության բրիտանական ամսագիր» տարեգրքում ճանաչվել է աշխարհի 7 լավագույն լուսանկարիչներից մեկը: Օտարալեզու շատ ամսագրերի շապիկներին ու էջերին հաճախ տեսած կլինենք հեռավոր երկրների խուլ արվարձանների, աղքատ թաղամասերի մոռացված բնակիչների, աշխարհանվաճ ու անհայտ մարդկանց լուսանկարներ` չիմանալով, որ դրանց հեղինակն Արա Գյուլերն է: Նրա անհատական ցուցահանդեսները կազմակերպվել են հարյուրավոր քաղաքներում:

Արա Գյուլերի գործունեության կարևոր էջերից է մոռացված Աֆրոդիտիաս քաղաքի «հայտնաբերումն» ու լուսանկարների միջոցով մարդկության ուշադրությունը պատմամշակութային այդ կոթողի վրա հրավիրելը: Երկու անգամ բարձրացել է Արարատ լեռն ու հարյուրավոր լուսանկարները տարածել աշխարհով մեկ: Աշխարհը նրա միջոցով է իմացել նաև Նեմրութ սարի մասին: Լուսանկարչի համաշխարհային վաստակն ու ձեռքբերումները նախորդ դարի 40-50-ականներից միջազգային լրատվամիջոցների ուշադրության կենտրոնում են:

1970-ականներին ֆոտոհարցազրույցներ է վերցրել այնպիսի հեղինակավոր դեմքերից, ինչպիսիք են Ուինսթոն Չերչիլը, Մարիա Կալլասը, Ջոն Բերգերը, Բերնարդ Ռասսելը, Սալվադոր Դալին, Պաբլո Պիկասոն, Ինդիրա Գանդին և այլք: 1975 թ. նկարահանել է «Հերոսի վերջը» վավերագրական ֆիլմը: Համարվում է Թուրքիայում ֆոտոնկարչության հիմնադիրը:  

2004 թվականից Ստամբուլի Տեխնիկական համալսարանի պատվավոր դոկտոր է: Նրա մականունն է «Ստամբուլի աչք» կամ «Ստամբուլի լուսանկարիչ»: Ստամբուլի կենտրոնում Գյուլերի արվեստանոցին հարող հատվածում գտնվող սրճարանը անվանակոչվել է «Արա Կաֆե»: