Իմ շնորհիվ «Սպարտակի» հայ երկրպագուների քանակն ավելացել է. Մովսիսյան

Հայաստանի ազգային հավաքականի և Մոսկվայի «Սպարտակի» հարձակվող Յուրա Մովսիսյանը championat.com-ին տված հարցազրույցում անդրադարձել է «Սպարտակում» իր ցուցադրած խաղին։

«Էմենիկեն հիանալի տղա է: Մենք իսկապես ընկերական հարաբերություններ ունեինք: Ինչ վերաբերվում է մրցակցությանը, ապա մեզանից յուրաքանչյուրը մարզումների ժամանակ ներդնում է իր ողջ ուժերը, իսկ թե ով դուրս կգա խաղադաշտ որոշում է մարզիչը: Միմյանց նախանձելու մասին խոսք լինել չի կարող: Ստացվում է, որ մրցակիցները կարող են լավ հարաբերություններ ունենալ: Վաղուց էի լսել Բարիոսի հնարավոր տեղափոխության մասին: Նորեկի հետ մրցակցության մասին ոչ մի նոր բան չեմ ասի: «Սպարտակի» նման ակումբում միշտ պետք է մրցակցություն լինի, ինչը յուրաքանչյուրի համար խթան է հանդիսանում ինչպես մարզումների, այնպես էլ խաղերի ժամանակ: Կենտրոնական հարձակվողի խնդիրը մրցակցի տուգանային հրապարակում հնարավորություն փնտրելն է: Հուսով եմ՝ ավելի շատ գոլեր կխփեմ խաղից և տուգանայինից, չնայած յուրաքանչյուր գոլ հավասարապես է արժևորվում: Գոլերի հստակ քանակ ինձ համար չեմ սահմանում: Հարձակվողը պետք է ձգտի որքան հնարավոր է շատ գոլ խփել: Անհեթեթ կլինի, եթե առաջնության ավարտից մի քանի տուր առաջ կարողանաս հասնել քո սահմանած գոլերի քանակին։ Իսկ մնացած տուրերո՞ւմ. պե՞տք է դադարես գոլ խփել: Չեմ բացառում, որ կարող է զգացմունքներով տարված համբուրեմ թիմի լոգոտիպը: Օրինակ, կարևոր հաղթանակից կամ հաղթական գոլի հեղինակ դառնալուց հետո: Սակայն երկրպագուները չպետք է լրացուցիչ պարտականություն դնեն ֆուտբոլիստի առջև: Քանի որ ֆուտբոլիստն իսկապես դա կարող է անել պահի ազդեցության ներքո»,- նշել է Մովսիսյանը։

– Ձեր տեղափոխությունը «Սպարտակ» նաև համարվում է մարքետինգային հաջող քայլ՝ Մոսկվայում ապրող հայ ֆուտբոլասերներին «Սպարտակի» երկրպագուների շարքերում ներգրավելու համար: Ի՞նչ եք կարծում, «Սպարտակի» երկրպագուների թիվն այս ընթացքում ավելացե՞լ է:

– Չեմ կարող հստակ թվեր ասել, սակայն շատ մարդկանց գիտեմ, ովքեր ժամանակին չեն երկրպագել «Սպարտակին», իսկ այժմ սատարում են թիմին և աշխատում են բաց չթողնել «Սպարտակի» մասնակցությամբ հանդիպումները:

– «Սպարտակից» հուշանվերներ բերելու խնդրանքով հաճա՞խ են դիմում։

– Հարազատներս և ընկերներս հաճախ են դիմում: Օրինակ՝ Երևան վերջին այցելությանս ժամանակ «Սպարտակի» 10 մարզաշապիկ եմ բերել: