Անակնկալ այցելություն

Այսօր ՀՀ ԱԻ նախարար Արմեն Երիցյանը, նախարարության ղեկավար կազմի և ԱՌՆԱՊ հիմնադրամի տնօրենի ուղեկցությամբ, այցելել է նախարարության աշխատակցուհի Հերիքնազ Կարապետյանին, որը ոտքի վիրահատության է ենթարկվել և բուժում է ստանում մայրաքաղաքի «Էրեբունի» բժշկական կենտրոնում։

Հ. Կարապետյանն ԱԻ նախարարության համակարգում շուրջ մեկ տարի առաջ աշխատանքի ընդունված սայլակավոր հաշմանդամներից է և մշտապես աչք է ընկել բարեխիղճ ու պատասխանատու աշխատանքով։

Ա. Երիցյանի այցը հաճելի անակնկալ էր ոչ միայն Հերիքնազի, այլև' բժշկական կենտրոնի անձնակազմի համար։ ԱԻ նախարարը հետաքրքրվեց աշխատակցուհու որպիսությամբ և կրկին շեշտեց, որ նախարարությունը և ինքն անձամբ մշտապես կանգնած են ԱԻՆ համակարգի բոլոր աշխատակիցների կողքին, որ իրեն կարող են դիմել ցանկացած պահի, ցանկացած խնդրով և կարվի ամեն հնարավորը' խնդիրներին լուծում տալու համար։

«Էրեբունի» բժշկական կենտրոնի անձնակազմը. որը նույնպես ներկա էր հանդիպմանը, խոստացավ հնարավորինս արագացնել ԱԻՆ աշխատակցուհու ապաքինումը։

Նախարարն առողջություն և շուտափույթ ապաքինում մաղթեց Հ. Կարապետյանին' ընդգծելով, որ նա անպայման պիտի ներկա լինի սեպտեմբերի 4-ին նշվող ԱԻ աշխատակցի օրվան նվիրված տոնակատարություններին։

Ներկայումս ՀՀ ԱԻ նախարարությունը մեր երկրի միակ պետական կառույցն է, որտեղ աշխատում է նաև 25 սայլակավոր հաշմանդամ։ Նրանք դարձել են ԱԻՆ մեծ ընտանիքի լիարժեք անդամներ ու գտնվում են ղեկավարության ուշադրության կենտրոնում։