Լևոն Մութաֆյանը՝ ընդդեմ Մանուկ Նիգոյանի. դիմում` Հրայր Թովմասյանին

Հայաստանի թատերական գործիչների միավորում հասարակական կազմակերպության վարչության քարտուղար Լևոն Մութաֆյանը դիմել է Արդարադատության նախարար Հրայր Թովմասյանին.

 ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐ՝
ՊԱՐՈՆ ՀՐԱՅՐ ԹՈՎՄԱՍՅԱՆԻՆ
ՄԵԾԱՀԱՐԳ ՊԱՐՈՆ ՆԱԽԱՐԱՐ,
Անշուշտ, մի քիչ ծիծաղելի կարող է թվալ, որ քննարկման նյութ ենք դարձնում մի ինքնահռչակ ու ինքնակոչ պատանու գործունեությունը, սակայն գործ ունենք հակաօրենսդրական մի իրողության հետ, որը պետք է անհապաղ կանխվի, քանի որ վիրավորում է Հայաստանում գործող բոլոր հասարակական կազմակերպությունները, արվեստի ու գրականության մարդկանց: Արդեն տևական ժամանակ Երևանի Հակոբ Կոջոյանի անվան դպրոցի 10-րդ դասարանի աշակերտ ՆԻԳՈՅԱՆ ՄԱՆՈՒԿԸ զանգվածային լրատվամիջոցներով ներկայանում է մերթ Հայաստանի ընթերցասերների միության, մերթ էլ Հայաստանի Ժամանակակից արվեստների երիտասարդական միության նախագահ:

Մեր ուսումնասիրությունները ցույց տվեցին, որ ՀՀ Արդարադատության նախարարության կողմից չկան գրանցված նման հասարակական կազմակերպություններ, ավելին՝ հասարակական կազմակերպությունների մասին ՀՀ օրենքը արգելում է կիրառել միություն բառը: Միաժամանակ տեղեկացանք, որ Հայաստան հատուկ գոյականն օգտագործող կազմակերպությունները պարտավոր են կատարել համապատասխան վճարումներ: Մինչդեռ վերոնշյալ կազմակերպությունները նման վճարումներ չեն կատարել, որևէ հաշվետվություն չեն ներկայացրել իրենց ֆինանսական գործունեության մասին: Երեկ ինքնակոչ նախագահը, խախտելով բարեկրթության բոլոր կանոնները, վիրավորանք հասցնելով շատերին՝ հայտարարել էր, թե նշյալ միությունները գործում են որպես «Մշակույթ» հիմնադրամի ենթակառուցվածքներ: Հիմնադրամների մասին ՀՀ օրենքի 6-րդ հոդվածի 1-ին կետում նշված է. « 1. Հիմնադրամն իրավունք ունի օրենքին եւ իրավական այլ ակտերին համապատասխան ստեղծել առանձնացված ստորաբաժանումներ (մասնաճյուղեր եւ ներկայացուցչություններ) եւ հիմնարկներ»:

Այսինքն, հիմնադրամը չի կարող ստեղծել նոր հասարակական կազմակերպություններ և միավորումներ իր կառուցվածքում: Այս ամենը հաստատում է, որ Նիգոյան Մանուկը հրապարակավ հանդես է գալիս գոյություն չունեցող կազմակերպությունների անունից, ինչն ինքնիրավչություն է, օրենքների կոպիտ խախտում

Խնդրում ենք Ձեր աջակցությունը՝ Հայաստանում գործող հասարակական կազմակերպությունների հեղինակության հետ խաղացող, հակաօրենսդրական գործունեություն ծավալող անձին զրկել գոյություն չունեցող կազմակերպությունների անունից հանդես գալու իրավունքից, քանի որ հասարակությունը սկսում է անվստահությամբ վերաբերել հասարակական կազմակերպություններին, կասկածի տակ առնել նրանց լրջությունը:

ՀԱՐԳԱՆՔՆԵՐՈՎ՝ ԼԵՎՈՆ ՄՈՒԹԱՖՅԱՆ
Հայաստանի թատերական գործիչների միավորում հասարակական կազմակերպության վարչության քարտուղար