Հատուկ կացարանները պետք է համապատասխանեն մի շարք պահանջների

Այսօրվանից՝ օգոստոսի 17-ից, ուժի մեջ մտավ ՀՀ կառավարության հուլիսի 18-ի որոշմամբ սահմանված՝ ՀՀ պետական սահմանի անցման կետերում ու տարանցիկ գոտիներում հատուկ կացարանների գործունեության և օտարերկրացիներին այնտեղ պահելու նոր կարգը: Ըստ այդմ՝ ուժը կորցրած է ճանաչվել ՀՀ կառավարության 2008 թ.-ի փետրվարի 7-ի «Հայաստանի Հանրապետության սահմանային անցման կետերում և տարանցիկ գոտիներում հատուկ կացարանների գործունեության ու օտարերկրացիներին այնտեղ պահելու կարգը սահմանելու մասին» որոշումը: Կառավարության հիմնավորմամբ՝ նոր կարգի ընդունումը պայմանվորված է այն հանգամանքով, որ մինչ այժմ գործող կարգը չի արտացոլել հատուկ կացարաններից օտարերկրացիների ազատման կարգի, այնտեղ պահելու ժամանակ նրանց սննդով, անկողնային պարագաներով, կենցաղային այլ առաջին անհրաժեշտության առարկաներով ապահովելու, սենյակների սպասարկման և մաքրման հետ կապված մանրամասները:

Մասնավորապես, նոր կարգում սահմանված է, որ օտարերկրացիները հատուկ կացարաններում պահվում են սահմանապահ զորքերի սահմանային վերահսկողության ստորաբաժանման պետի կամ նրան փոխարինող անձի որոշման հիման վրա: Մինչև օտարերկրացիներին հատուկ կացարանում պահելը, ինչպես նաև կացարանում գտնվելու ամբողջ ընթացքում` առողջական վիճակն ստուգելու և վարակիչ հիվանդություններով տառապող անձանց հայտնաբերելու, ինչպես նաև անհրաժեշտության դեպքում հետագա բժշկական հսկողության իրականացման նպատակով նրանք հետազոտվում են անցման կետում գործող բուժկետի և սանիտարական-կարանտինային կետի անձնակազմի կողմից: Սահմանապահներն օրենքով սահմանված կարգով իրավունք ունեն նաև նրանց ենթարկել զննության, սակայն արգելվում է զննումն իրականացնել հակառակ սեռի ներկայացուցչի կողմից:

Հատուկ կացարանը հուսալի փականներով փակվող դռներով սենյակ (շինություն) է` կից միջանցքով, որտեղ կբացառվի այլ անձանց ներթափանցումը, ինչպես նաև սահմանապահին հնարավորություն կընձեռվի մշտապես հսկողություն իրականացնելու այնտեղ պահվող անձանց նկատմամբ: Յուրաքանչյուր անցման կետում պետք է լինի առնվազն երկու սենյակ` տարբեր սեռերի անձանց, տարբեր երկրների քաղաքացիներին՝ իրենց ցանկությամբ, տարբեր կրոնների ներկայացուցիչներին առանձին պահելու համար: Հատուկ կացարանները պետք է ապահովված լինեն սեղանով, աթոռներով, անշարժ պահարանով` ձեռքի իրերի և ուղեբեռի համար, կենցաղային իրերի կողապահարանով, մահճակալով, այդ թվում` մանկական, խոհանոցով, անկողնային պարագաներով, հեռուստացույցով, սպասքի պարագաներով, լվացարանով, սանհանգույցով, սենյակը մաքրելու պիտույքներով, կենցաղում օգտագործվող այլ առարկաներով՝ սրբիչ, օճառ, գոգաթիակ և այլն, հակահրդեհային անվտանգության միջոցներով, օդափոխիչով: Օտարերկրացիներն անձնական հիգիենայի համար ապահովվում են նաև տաք ջրով լողանալու հնարավորությամբ: Հատուկ կացարանների սենյակներում նվազագույն ջերմաստիճանը պետք է լինի + 18 C:

Շարունակությունն` այստեղ: